ДХХ ва Бош прокуратура ҳузуридаги Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда ҳоким ўринбосари, Транспорт бошқармаси бошлиғи, МИБ ходими ва бошқаларнинг ноқонуний ҳаракатларига чек қўйилди.
Қашқадарё вилояти Кўкдала тумани ҳокими ўринбосари плёнка маҳсулотлари ишлаб чиқаришга ихтисослашган хусусий корхонани “Ҳар бир оила — тадбиркор” дастури доирасида маҳаллий деҳқонларга плёнка етказиб берувчи таъминотчи корхона сифатида тайинлаш эвазига 5 минг доллар талаб қилган.
Аммо у сўралган пулдан 15 миллион сўм олган вақтида ашёвий далиллар билан ушланган.
Терговга қадар текширув давомида, ҳоким ўринбосари ўзининг “холис ёрдами” эвазига аввал 10 миллион сўм олгани ҳам аниқланган. У муқаддам Жиноят кодексининг 167-моддаси (ўзлаштириш ёки растрата йўли билан талон-торож қилиш) билан судланган бўлса-да, ўз хатосидан тўғри хулоса чиқармаган.
Андижон шаҳрида кузатилган ҳолатда йўловчи ташиш фаолияти билан шуғулланувчи МЧЖ раҳбари маҳаллий фуқаронинг ишончига кириб, ўзининг мансабдор танишлари орқали унинг номига масъулияти чекланган жамият ташкил этиб, Эски шаҳар—Олтинкўл йўналишида йўловчи ташиш бўйича аҳолига пуллик хизмат кўрсатиш учун ўтказилиши режалаштирилган тендерда ғолибликни қўлга киритиб бериш эвазига 7500 доллар талаб қилган ва сўралган пулни олган вақтида ушланган.
Терговга қадар текширув давомида, Андижон вилояти транспорт бошқармаси бошлиғи вазифасини вақтинча бажарувчи мансабдорнинг ушбу ноқонуний ишга алоқадорлиги аниқланиб, у ҳам просессуал тартибда ушланган.
Мазкур шахс ҳам муқаддам судланган бўлса-да, хатосидан тўғри хулоса чиқармаган.
МИБнинг Тошкент шаҳар бошқармаси катта инспектори бюронинг марказий аппарати иш юритувидаги паррандачилик корхонаси ҳисобидан акциядорлик тижорат банки фойдасига жами 11 миллион 108 минг 629 доллар ва 265 187 евро миқдоридаги қарздорликни ундириш тўғрисидаги ижро иши юзасидан, корхонага тегишли кўчмас мулкларни баҳолаш ишлари учун белгиланган хизмат ҳақини турли важлар билан баҳолаш фирмаси фойдасига оширилган нархда кўрсатиб, банк томонидан баҳолаш фирмаси ҳисобига ўтказилган ортиқча пул маблағидан ўзининг улуши сифатида 2500 доллар олган вақтида ДХХ ходимлари томонидан ушланган.
Фарғона вилоятида кузатилган ҳолатда Ёзёвон тумани ҳокимлиги қошидаги “Хўжалик ҳисобидаги уй-жойларни рўйхатга олиш, алмаштириш ва тақсимлаш” бўлими бошлиғи ўзининг ваколатли танишлари орқали, маҳаллий фуқаронинг яшаш хонадони учун ордер ва кадастр ҳужжатларини тайёрлаб бериш эвазига 2500 доллар олган вақтида ушланган.
Ҳозирда мазкур шахсларнинг барчасига нисбатан жиноят ишлари қўзғатилиб, қамоқ эҳтиёт чораси қўлланилган.
Изоҳ (0)