Давлат хавфсизлик хизмати ходимлари томонидан Андижон вилоятида 42 млрд сўмлик лойиҳани олиб бериш эвазига пул талаб қилган шахслар ушланди.
Маълум қилинишича, Андижон туманида яшовчи 58 ёшли А.Б. ва Андижон шаҳрида истиқомат қилувчи 53 ёшли Х.У. ўзаро тил бириктириб, йўл қурилиши соҳасида фаолият юритувчи МЧЖ раҳбарининг ишончига кирган.
Улар юқори лавозимда ишловчи танишлари орқали, МЧЖга Асака туманидаги “4Р-112” автомобиль йўлининг 4 километр қисмига асфальт-бетон қопламасини ётқизиш бўйича лойиҳани олиб бериш эвазига, лойиҳа учун ажратиладиган 42 миллиард сўмнинг 10 фоизини (4,2 миллиард сўм) беришини талаб қилган.
Давлат хавфсизлик хизмати ва Бош прокуратура ҳузуридаги департамент ходимлари томонидан Андижон шаҳрида ўтказилган тезкор тадбирда А.Б. сўралган пул маблағи ҳисобидан 20 минг доллар олган вақтида ашёвий далиллар билан ушланди.
Ҳозирда мазкур шахсларга нисбатан Жиноят кодексининг 168 (фирибгарлик) ва 28, 211-моддалари (пора бериш) билан жиноят иши қўзғатилиб, қамоқ эҳтиёт чораси қўлланилган.
Эслатиб ўтамиз, 2023 йилнинг май ойида Наманганда 1 гектар ерни тендерда ютиб бериш учун 10 минг доллар сўраган мансабдор ушланган эди. Октябрь ойида эса Хоразмда фаолият бошлаганига 4 кун бўлган фирма тендердаги 5 та танловда ғолиб бўлиб, 1 миллиард сўмдан ортиқ маблағни қўлга киритгани маълум бўлганди.
Изоҳ (0)