Иордания, Ироқ ва Ливан ҳукуматлари Эрон ҳаво ҳужумлари якунланиши ортидан 14 апрель куни мамлакатлар ҳаво ҳудуди қайта очилганини маълум қилди. Бу ҳақда Араб Неwс нашри хабар берди.
Эрон расмийлари Исроилга қарши амалга оширилган ҳужумлар якунланишини эълон қилиши биланоқ ҳаво ҳудуди парвозлар учун очилган. Давлат телевидениелари бу ҳақда хабар берган.
Иордания ҳукумати 13 апрель куни маҳаллий вақт билан 20:00 дан бошлаб барча кирувчи, халқаро ва транзит рейслар учун мамлакат ҳаво ҳудудини ёпганини эълон қилган эди. Расмийлар бу қарор Иордания ҳаво ҳудудида фуқаро авиацияси хавфсизлигини таъминлаш мақсадида қабул қилинганини билдирган эди.
Манбада айтилишича, Иордания ҳарбийлари ёпилган ҳаво ҳудудига кириб келган Эрон ўрта масофага учувчи ракеталарини фаол тарзда қайтаришга ҳаракат қилган. Пойтахт Уммон ҳамда Сурия ва Исроил билан чегарадаги шимоли-ғарбий ҳудудларда кўплаб ракеталар ва Эрон дронлари уриб туширилган.
Айни пайтда Теҳроннинг Меҳробод аэропорти ва мамлакатнинг бошқа бир қанча шаҳарларидаги аэропортлар душанба тонгига қадар ёпилган. Яқин Шарқдаги таранглик туфайли ички рейслар ҳам бекор қилинган. Иордания билан ҳам парвозлар қайта йўлга қўйилмаган.
Маълумот ўрнида, 14 апрелга ўтар кечаси Эрон Исроилга қарши ҳаво ҳужумлари содир этди. Ушбу ҳужум Исроилнинг Сурия пойтахти Дамашқдаги Эрон элчихонасига ҳужуми ва мамлакат олий қўмондонларидан бири ҳалок бўлишига жавобан амалга оширилгани маълум қилинган.
Иордания ва бир қанча Яқин Шарқ манбалари ёзишича, Уммон маъмурияти Теҳроннинг эҳтимолий ҳужумини инобатга олиб, ҳаво мудофаасини олдиндан шай ҳолатга келтиришга эришган. Оқибатда ракеталарнинг кўпчилиги Исроилга етиб бормай, Иордания осмонида уриб туширилган.
Изоҳ (0)