Япония ташқи ишлар вазири Ёко Камикава 14 апрель куни эълон қилган баёнотида Эроннинг Исроилга қарши жавоб ҳужумини қоралаб, буни кескинлашув деб атади ҳамда вазиятдан чуқур хавотирда эканини айтди. Бу ҳақда Reuters хабар берди.
Бу ҳужум Яқин Шарқдаги ҳозирги вазиятни янада ёмонлаштиради. Биз чуқур хавотирдамиз ва бундай кескинлашувни қоралаймиз, — дейилади баёнотда.
Баёнотда, шунингдек, тинчлик ва барқарорлик Япония учун айниқса муҳим экани ва ҳукумат вазиятнинг ёмонлашувига йўл қўймаслик учун зарур дипломатик чораларни кўришда давом этиши таъкидланган.
Эрон 13 апрель куни кечқурун Исроил ҳудудига биринчи тўғридан тўғри ҳужумида портловчи дронларни ва ракеталарни учирди. Мамлакат ушбу ҳужумни Эроннинг Суриядаги элчихонасига ҳужум учун жавоб дея изоҳлаган.
Маълумот учун, Япония нефть импортида асосан Яқин Шарққа таянади, хом нефтнинг 95 фоизи минтақадан келади.
Япония ҳам анъанавий равишда Эрон билан дўстона давлат бўлиб келган, бош вазир Фумио Кисида сентябрь ойида Эрон президенти Иброҳим Раиси билан учрашиб, Эрон ядро дастурини муҳокама қилган эди.
Изоҳ (0)