Ўзбекистон мактабларида ёзги таътил бир ярим ой, яъни 6 ҳафта бўлиши мумкинлиги ҳақида хабарлар тарқалди. Мактабгача ва мактаб таълими вазирлиги буни рад этди.
Тарқалган хабарларда узоқ таътил давомида болалар билимни унутиб қўйишлари мумкинлиги сабаб айрим ота-оналар бу таклифни қўллаб-қувватлагани, бошқалар бу қарорга қарши экани айтилган. Дунёдаги айрим давлатларда ёзги таътил қисқароқ экани, лекин йил давомида кўплаб байрам кунлари борлиги ҳам қайд этиб ўтилган.
“Дарё” бу хабарлар қанчалик асосли эканини аниқлаш мақсадида Мактабгача ва мактаб таълим вазирлиги билан боғланди.
“Бу гапни ўйлаб топишганми ёки таклиф сифатида айтилганми аниқ билмайман. Лекин мактабларда ёзги таътил қисқаради деган масала вазирликда кўтарилгани ҳам, бу гап бўлгани ҳам йўқ”, деб жавоб берди вазирлик ахборот хизмати раҳбари Дилфуза Собирова.
Вазирлар Маҳкамасининг 2017 йил 15 мартдаги қарори билан тасдиқланган “Умумий ўрта таълим тўғрисида”ги низомга кўра, ўқув йилининг давомийлиги 34 ҳафта (1-синфлар учун 33 ҳафта)ни ташкил қилади.
Ўқув йили давомидаги таътилларнинг муддатлари қуйидагича белгиланган:
- кузги таътил — 4 ноябрдан бошлаб 6 календарь кун;
- қишки таътил — 28 декабрдан бошлаб 14 календарь кун;
- баҳорги таътил — 21 мартдан бошлаб 7 календарь кун;
- ёзги таътил — охирги босқичли назорат синови ўтказилган кундан (босқичли назорат ўтказилмайдиган синфлар учун ўқув йили тугаган кундан кейинги кундан) бошлаб 1 сентябргача.
Баҳорги таътил 2025 йилда жума кунига тўғри келади. 20 март, пайшанба куни мактабларда III чоракнинг сўнгги куни бўлади. IV чорак дарслари 28 март, жума кунидан бошланади.
Изоҳ (0)