Шимолий Корея етакчиси Ким Чен Ин Россия Федерациясининг Курск шаҳрида ҳарбий операцияларда қатнашган шимолий кореялик аскар ва қўмондонларни олқишлади. Бу ҳақда KCNA хабар берди.
Маълум қилинишича, Ким Чен Ин 20 август куни хориждаги ҳарбий амалиётлар учун масъул шимолий кореялик ҳарбий бирликларнинг етакчи қўмондонлари билан шахсан учрашган. Президент ҳарбийларнинг жанговар ҳаракатлари ҳақида батафсил маълумот олиб, уларни Россиянинг Курск шаҳрини Украина аскарларидан тозалашдаги муваффақиятлари учун мақтаган.
“Бизнинг армиямиз қаҳрамон қўшин. Нега деганда, улар қаҳрамон халқимиз томонидан тарбияланиб вояга етказган ўғлонлардан ташкил топган. Армиямиз ўзининг юксак фазилатларини тўлиқ намоён этди. Бу натижа билан бизнинг армиямиз ўзини дунёнинг энг кучлиси сифатида танитди. Улар ҳозир қилиши керак бўлган ишни қилмоқда. Келажакда ҳам шундай бўлади”, деди КХДР етакчиси.
Россия билан стратегик ҳамкорлик
Ким Чен Ин ва Россия президенти Владимир Путин ўртасида 2024 йил июнь ойида кенг қамровли стратегик ҳамкорлик шартномаси имзоланган эди. Ушбу келишув 2024 йил 4 декабрда кучга кирган бўлиб, у жами 23 моддадан иборат. Келишувнинг 4-моддасига кўра, агар бир томон қуролли ҳужум туфайли уруш ҳолатига тушса, иккинчи томон БМТ Низомининг 51-моддаси ва икки давлат қонунларига мувофиқ барча мумкин бўлган ҳарбий ёрдамни кўрсатиши шарт.
Россия ТИВнинг таъкидлашича, ушбу шартнома икки томонлама кўп қиррали ҳамкорликни янги стратегик даражага олиб чиқади ва шимоли шарқий Осиё ҳамда Осиё-Тинч океани минтақасида барқарорликни таъминлашга хизмат қилади. Маълумот учун, Жанубий Корея миллий разведка хизматига кўра, КХДР Россияга Украина билан урушда фойдаланиш учун 15 мингдан ортиқ ҳарбий куч юборган. Уларнинг тахминан 600 нафари ҳалок бўлган, камида 4 минг нафари эса яраланган.
Изоҳ (0)