АҚШ маъмурияти раҳбари Дональд Трамп Россия президенти Владимир Путин билан Владимир Зеленскийнинг учрашувини ташкил этишга уринмоқда, чунки бу Украинада тинчликка йўл очади деб ҳисоблайди. Бу ҳақда Axios портали хабар берди.
Портал Америка етакчисининг номи ошкор этилмаган ёрдамчиларига таяниб, Трампнинг Украинага нисбатан “ягона қисқа муддатли мақсади” Путин ва Зеленский ўртасида юзма-юз музокаралар ташкил этишдан иборат эканлигини ёзади.
“Қолган ҳаммаси муқаддима. Қолган барча ҳаракатлар шу лаҳзада тинчликка эришиш учун қаратилган”, деди Трампнинг маслаҳатчиси.
Манбаларнинг таъкидлашича, нафақат АҚШ давлат котиби Марко Рубио ва Оқ уй эгасининг махсус вакили Стив Уиткофф, балки Трампнинг ўзи ҳам Путин ва Зеленскийнинг шахсан учрашишини кутмоқда.
“Битимга эришишнинг усули бор: уни муҳокама қилиш учун харидор ва сотувчини бир вақтнинг ўзида бир жойга тўплаш. Биз иккала томон ҳам битимни хоҳлаётганини ва унинг қандай кўринишда бўлишини тушунишга ҳаракат қилмоқдамиз”, деди Трампнинг Украина йўналишидаги музокаралар жараёнидан хабардор бўлган маслаҳатчиларидан бири.
Портал маълумотларига кўра, АҚШнинг Украина бўйича “уч босқичли режаси” тинчликни таъминлаш бўйича қадамларни аввал Россия ва Америка раҳбарларининг музокараларида, кейин эса Трамп ва Зеленский учрашувида келишиб олишдан иборат. Вашингтоннинг фикрича, Путин ва Зеленскийнинг Америка томони иштирокидаги музокаралари якуний босқич бўлиши керак.
Мақолада айтилишича, АҚШ разведкасининг Украинадаги жанговар ҳаракатлар боришига берган баҳолари турлича.
“Хулосалардан бири шуки, Россия Қуролли кучлари октябргача Донбассни тўлиқ назорат остига олиши мумкин”, деб ёзади Axios.
Бошқа хулосаларга кўра, ҳарбий ҳаракатлар оғир кечади ва уларнинг натижаси унчалик аниқ бўлмайди.
Бундан ташқари, портал маълумотларига кўра, Трамп маслаҳатчиларидан бири Вашингтоннинг Киевга хавфсизлик кафолатлари АҚШ қўшинларини Украинада жойлаштиришни ўз ичига олиши мумкинлиги ҳақидаги саволга ижобий жавоб берган. Бошқа бир маслаҳатчи бу борада аниқлик йўқлигини айтган.
“Биз матбуот орқали музокаралар олиб бормаймиз”, дея қўшимча қилган ушбу амалдор.
Изоҳ (0)