Венгрия бош вазири Виктор Орбан Россия аллақачон Украинадаги урушда ғалаба қозонганини айтди. У Европа давлатларини бу фактни тан олишга ва Кремль билан музокара бошлашга чақирди. Бу ҳақда Reuters хабар берди.
Орбаннинг бу баёноти АҚШ ва Россия президентлари учрашуви арафасида янгради. Давлат раҳбарлари 15 август куни Аляскада урушни тугатиш масаласини муҳокама қилади. Орбан илгари ҳам Украинага ҳарбий ёрдам кўрсатишга қарши чиққан. У Европанинг “Украина ўз келажагини ўзи белгилаш ҳуқуқига эгалиги” ҳақидаги қўшма баёнотини қўллаб-қувватлашдан бош тортган.
Венгрия бош вазири ҳозирги можаро чексиз давом этмайди, деган фикрда. У урушда Россия аллақачон ғалаба қозонганини таъкидлади.
Масала шундаки, Ғарб қачон ва қандай шароитларда бу воқеани тан олади ва бундан қандай оқибатлар келиб чиқади, деди Орбан.
Россия энергия ресурсларига катта даражада қарам бўлган Венгрия Украинага қурол етказишни рад этган. Шунингдек, мамлакатнинг Европа Иттифоқига аъзо бўлишига ҳам қарши чиққан. У буни иқтисодиёт ва фермерларга етказилиши мумкин бўлган салбий таъсир билан изоҳлаган.
Орбан таъкидлашича, агар АҚШ ва Россия етакчилари музокара столида ўтириб, Европани чақирмасалар, у автоматик тарзда “жараён иштирокчиси эмас, балки менюдаги таом”га айланади. Бундан ташқари, у Европа Иттифоқининг Украина бўйича қўшма баёноти Европани халқаро майдонда “кулги ва ачинишга сабаб бўлувчи” ҳолатга солаётганини айтган.
Изоҳ (0)