Андижон шаҳрида 286,3 млн сўмлик электр энергиясидан ноқонуний фойдаланган автомобилларни ювиш шохобчаси аниқланди, деб хабар бермоқда Прокуратура департаменти ахборот хизмати.
Унга кўра, ҳолат Бош прокуратура ҳузуридаги департаментнинг Андижон шаҳар бўлими ва “Ўзэнергоинспекция” ҳудудий бошқармаси ходимлари ҳамкорлигида ўтказилган тезкор тадбирда аниқланган. Фуқаро Р.М. “З.ҳ.” МЧЖга қарашли “Жумабозор” МФЙ ҳудудида жойлашган автомобилларни ювиш шохобчасида умумий фойдаланишдаги электр тармоғига тижорат мақсадида тўғридан-тўғри уланиб, жами 286,3 миллион сўмлик электр энергиясидан ноқонуний фойдаланган.
Мазкур ҳолат юзасидан Жиноят кодексининг 169-моддаси (ўғрилик) билан жиноят иши қўзғатилиб, тергов ҳаракатлари ўтказилмоқда.
Бундан аввал Андижон вилоятида учта истеъмолчи 1 миллиард 710 миллион сўмлик электр энергиясидан ноқонуний фойдалангани аниқланганди. Шунингдек, Тошкент ва Наманган вилоятларида электрдан ноқонуний фойдаланганлар 750 млн сўмдан зиёд зарар етказгани, Фарғонада 301 млн сўмлик электр энергиясидан ноқонуний фойдаланган хусусий корхона аниқлангани тўғрисида хабар берилганди.
Изоҳ (0)