Украина президенти Владимир Зеленский ўт очишни тўхтатиш эвазига Россияга ҳудудий ён бериш ниятида эмаслигини айтди. Бу ҳақда The Guardian хабар берди.
Зеленскийга кўра, Москва қўлга киритган ҳудудлардан келажакда уруш бошлаш учун фойдаланади. У америкалик ҳамкасби Дональд Трамп ҳудуд бериш ғоясини қўллаб-қувватламаслигига умид қилмоқда. 15 август куни Аляскада Россия президенти Владимир Путин ва АҚШ раҳбари музокара олиб боради.
Зеленскийнинг таъкидлашича, АҚШ босими остида Донбассни Россияга топшириш хавфли, чунки Россия талаб қилаётган ҳудуд мамлакатнинг қарийб 90 минг квадрат километрини ташкил этади. Ўтган ҳафта Россия урушни тўхтатиш эвазига Украинадан Донбасснинг ҳозирги назорат қилинаётган қисмларидан чиқишни талаб қилган. Трамп эса бу ҳолатда “ҳудуд алмашинуви” эҳтимолини истисно этмаган.
Украина раҳбари Россия “фақат олдинга силжимаслик, лекин ҳеч қаердан чиқиб кетмаслик”ни таклиф қилаётганини айтди. Шунингдек, ҳудуд алмашиш масаласи кун тартибида йўқлигини билдирди.
Биз Донбассни тарк этмаймиз. Буни қила олмаймиз. Россия учун Донбасс — келажакдаги янги ҳужумга таянч нуқта. Мен эртага янги уруш бошланмаслигига ва Путин ҳеч бўлмаганда Днепр, Запороже ва Харьковни босиб олишга уринмаслигига кафолат берадиган ҳеч нарса эшитмадим — бирорта ҳам таклиф йўқ, деди у.
Сиёсатчи Россия талаб қилаётган ҳудуд стратегик аҳамиятга эга эканини таъкидлади, чунки у Украинанинг марказий шаҳарларни ҳимоя қилади. Президент таъкидлашича, ҳудуд ва мамлакатнинг келажакдаги хавфсизлиги ҳақида гаплашишдан аввал Путин ҳозирги фронт чизиғида ўт очишни тўхтатишга, икки томон барча ҳарбий асирлар ва йўқолган болаларни қайтаришга рози бўлиши керак.
Ҳудуд масаласини хавфсизлик кафолатларидан ажратиб кўриб бўлмайди, деди у.
Зеленский Аляскадаги Трамп ва Путин учрашувига бормаслигини маълум қилди, аммо ундан кейин уч томонлама учрашув бўлишига умид билдирди. Россия президенти эса ҳозирча Зеленский билан учрашишга тайёр эмаслигини айтган.
Изоҳ (0)