Тошкентда Ўзбекистон ва Туркия махсус хизматлари учрашуви бўлиб ўтди, деб хабар бермоқда ЎзА.
Маълум қилинишича, 12 сентябрь куни Ўзбекистон Давлат хавфсизлик хизмати марказий аппаратида ДХХ раиси Абдусалом Азизов Иброҳим Қалин раҳбарлигидаги Туркия Миллий разведка ташкилоти делегациясини қабул қилди.
Учрашув давомида хавфсизлик соҳасидаги икки томонлама ҳамкорликнинг долзарб масалалари, хусусан, терроризм ва экстремизм, ноқонуний миграция, уюшган жиноятчиликка қарши курашиш, террорчилик фаолиятига алоқадор бўлган қидирувдаги шахсларни ушлаш ва депортация қилиш масалалари муҳокама қилинди.
Туркия делегациясининг ташрифи икки давлат ўртасидаги юқори даражадаги сиёсий алоқалар жадал ривожланиб бораётган бир шароитда бўлиб ўтди.
“Ўзбекистон ва Туркия қардош давлатлар сифатида замонавий хавф-хатар ва таҳдидларга қарши курашиш масалаларида якдил позицияга эга. Ҳозирги вақтда фақат биргаликдаги саъй-ҳаракатлар ва амалий ҳамкорлик мамлакатларимизни терроризм ва экстремизмнинг ҳар қандай кўринишларидан ҳимоя қилишга қодир эканлигини таъкидлаш жоиз”, дейилади хабарда.
Изоҳ (0)