Тошкент вилояти Олмалиқ шаҳрида мактаб ўқувчилари сувдан заҳарлангани ҳақида хабар берилганди. Болалар омбудсмани ҳолат юзасидан муносабат билдирди.
Маълум қилинишича, Олмалиқ шаҳридаги ихтисослашган мактаб ўқувчилари мактаб ҳудудидаги филтрланмаган сув истеъмол қилиши натижасида соғлиғидан шикоят қилиб, жорий йилнинг 15 сентябрь кунидан 19 сентябрь кунига қадар 12 нафар ўқувчи ўткир ичак касаллигига гумон қилиниб, юқумли касалликлар бўлимига мурожаат қилган.
Мазкур ҳолат болалар омбудсмани томонидан ўрганилмоқда. Ҳозирда мактаб ўқувчиларининг соғлиғи ижобий бўлиб, уларнинг 7 нафарига уйида даволанишга жавоб берилган.
Ҳолат юзасидан Соғлиқни сақлаш вазирлиги Санитария-эпидемиологик осойишталик ва жамоат саломатлиги хизматининг Тошкент вилояти бошқармаси томонидан текшириш ишлари олиб борилиб, сувдан, озиқ-овқат маҳсулотлари ва бошқа воситалардан кимёвий таҳлил учун намуналар олинди.
Шунингдек, мазкур вазият вилоят мактабгача ва мактаб таълими бошқармасининг ишчи гуруҳи томонидан ўрганилмоқда. Ҳозирда ҳолат юзасидан Олмалиқ туман прокуратураси томонидан терговга қадар текширув олиб борилмоқда.
Бундан аввал Тошкент шаҳрида битта кафеда овқатланган 23 киши заҳарланиб, шифохонага ётқизилган эди.
Овқатдан заҳарланиш ҳолатларидан жабрланганлар
Ўзбекистонда 2024 йилнинг 1-чорагида 18 та овқатдан заҳарланиш ҳолатлари қайд этилган бўлиб, бунда 143 нафар фуқаролар жабрланган.
ЖССТ маълумотларига кўра, дунёда ҳар йили хавфли озиқ-овқат маҳсулотларини истеъмол қилиш натижасида 600 миллионга яқин инсон жабрланади. 420 минг киши микроорганизмлар ёки кимёвий моддалар билан ифлосланган озиқ-овқатларни истеъмол қилиш натижасида вафот этади. Уларнинг 125 минг нафарини 5 ёшгача бўлган болалар ташкил этади.
Озиқ-овқат хавфсизлиги ишлаб чиқаришдан тортиб, йиғиб олиш, қайта ишлаш, сақлаш, тарқатиш, тайёрлаш ҳамда истеъмол қилишгача бўлган барча босқичларда муҳим рол ўйнайди. Ишлаб чиқариш занжирининг барча босқичида озиқ-овқат маҳсулотларининг ифлосланиши ёки зарарланиши хавфи мавжуд бўлиб, уларнинг хавфсизлиги учун ҳар бир иштирокчи – тадбиркор жавобгар.
Изоҳ (0)