Бухорода камида 53 киши овқатдан заҳарланди. Бу ҳақда вилоят соғлиқни сақлаш бошқармаси ахборот хизмати хабар берди.
Маълум қилинишича, 12 апрель куни, соат 22:00 ларда Бухоро туман марказий шифохонасига қоринда оғриқ, кўнгил айниш, қусиш ва умумий ҳолсизликка шикоят қилиб беморлар мурожаат қилишни бошлаган. Барча беморлар Бухоро тумани маркази Гала Осиё шаҳрида жойлашган “Оқшом” тўйхонасида овқат истеъмол қилиш натижасида ушбу шикоятлар келиб чиққанини билдирган.
Барча беморларга ўткир диарея, гастритик ва гастроэнтеритик шакли, ўрта оғирликда кечиши, овқатдан заҳарланиш ташхиси қўйилган ва тегишли инфузион терапия бошланган. Бухоро туман марказий шифохонасига кеч соат 03:00 га қадар жами 16 нафар бемор (4 нафар болалар, 12 нафар катта ёшдагилар) мурожаат қилган.
Бундан ташқари, Вобкент туман тиббиёт бирлашмасига қарашли марказий шифохонага ҳам худди шундай шикоятлар билан жами 37 нафар бемор (9 нафар бола ва 28 нафар катталар) мурожаат қилган. Уларга ҳам мазкур ташхис қўйилиб, мутахассислар томонидан консултация ўтказилиб, инфузион терапия бошланган.
13 апрель эрталаб соат 09:00 ҳолатида Бухоро туманида даволанаётган 11 нафар бемор ва Вобкент туманида даволанаётган 32 нафар беморларнинг аҳволи яхшиланиб, қониқарли аҳволда уйига жавоб берилган.
“Кун давомида қолган беморлар ҳам аҳволи яхшилангач, уйига жавоб берилади. Тиббиёт бригадалари томонидан тўйда қатнашган меҳмонлар аҳволи ҳудудлар кесимида назоратга олинган”, – дейилади хабарда.
Изоҳ (0)