“Музлик даври” анимацион фильмининг олтинчи қисми ҳозирда ишлаб чиқаришнинг дастлабки босқичида. Бу ҳақда Ялқов Сид образига овоз берган актёр Жон Легуизамо NPR подкастида маълум қилди.
Суҳбат давомида бошловчи ўғлининг “Музлик даври” мультфильмлар сериясини севиб томоша қилишини айтиб ўтди. Легуизамо бунга жавобан “буни эшитганимдан жуда хурсандман, биз мазкур мультфильмнинг олтинчи қисмини суратга олмоқчимиз”, деди актёр мультфильм қаҳрамонининг овозида.
Бироқ Легуизамо янги фильм ҳақида бошқа ҳеч қандай маълумот бермади. Disney компанияси ҳам мультфильм устидаги иш бошлангани ҳақидаги хабарларни расман тасдиқламади.
2021 йилда Disney “Музлик даври” ва “Рио” асарларини яратган Blue Sky Studios анимацион студиясини ёпган эди. Компания бундай қарорни ўша вақтдаги иқтисодий вазият билан изоҳлаган эди. Шундай бўлса-да, Disney франшизани “Музлик даври: Бакнинг саргузаштлари” номли анимацион фильм билан тўлдиришга муваффақ бўлди. Мультфильм Blue Sky ва франшиза продюсерлари иштирокисиз яратилди ва 2022 йилда Disney+ томонидан намойиш этилди. Кино танқидчилар мазкур фильмни ижобий баҳоламади.
Мамонт Менни, йўлбарс Диего ва ялқов Сиднинг саргузаштлари ҳақидаги биринчи “Музлик даври” фильми 2002 йилда чиқарилган. Франшизанинг сўнгги — бешинчи қисми 2016 йилда намойиш этилган. “Музлик даври” кассаларда биринчи ўринни эгаллаган бошқа франшизалар каби эътирофларга эга бўлмаса-да, жами 3,219 миллиард даромад билан барча даврларнинг энг юқори даромад келтирган анимацион франшизалари рўйхатидан жой олган.
Изоҳ (0)