Тошкент шаҳрида Мажбурий ижро бюроси ходимлари жарималарни ўз вақтида тўламаган қарздорнинг Tesla’сини хатлади. Бу ҳақда “Дарё”га МИБ матбуот хизмати хабар берди.
Қайд этилишича, МИБнинг Шайхонтоҳур туман бўлими иш юритувида ИИББ Йўл ҳаракати хавфсизлиги бошқармасининг қарорларига асосан қарздор Ф.Ш.дан 186 та ижро ҳужжатлари бўйича жами 116 миллион сўмдан ортиқ миқдордаги маъмурий жарима ундириш тўғрисидаги ижро ҳужжатлари мавжуд.
Мазкур ижро ҳужжатлари бюронинг Шайхонтоҳур туман бўлими иш юритувига 2023 йилнинг июнь ойидан бошлаб ҳозирги кунга қадар жами 186 та ижро ҳужжатлари келиб тушган бўлса-да, қарздор томонидан ихтиёрий равишда бартараф қилинмаган.
Қарздорликлар бартараф қилинмагач, бюро томонидан 18 май куни қарздорга тегишли Tesla Модель 3 русумли автотранспорт воситасига қидирув эълон қилинган.
Олиб борилган тезкор тадбирлар давомида қидирувда бўлган Tesla қарздорнинг хонадонидан топилиб, қарздор фуқарога автотранспорт воситасини хатлаб, вақтинча сақлаш учун жарима майдонига қўйилиши билдирилганда, қарздор аввал фаол қаршилик кўрсатиб, давлат ижрочисининг қонуний талабига бўйсунмаган бўлса, кейинчалик масъул ходимлар томонидан ҳолатнинг ҳуқуқий оқибати тушунтирилганидан сўнг қарздор томонидан машина ихтиёрий равишда топширилган.
Ҳозирги кунда автотранспорт воситасини реализация қилиш чоралари кўрилмоқда.
Аввалроқ Тошкент вилояти Оҳангарон туманида банкдан қарийб 420 миллион сўм қарзи бор фуқаронинг машинаси хатлангани, Тошкент вилоятида МИБ томонидан “свет”дан 22,6 млрд сўм қарздорлик ундирилгани, Тошкентда қарздор ташкилотнинг Malibuъси аукционда сотиб юборилгани тўғрисида хабар берилганди.
Изоҳ (0)