Европа Иттифоқи аёлларнинг ер ва мулк эгаси бўлишига тўсқинлик қилувчи чекловлар, юқори даражадаги қашшоқлик, шунингдек, иқтисодиётнинг юқори даромадли соҳаларидаги гендер тенгсизликни бартараф этишга қаратилган лойиҳани ишга туширди.
Лойиҳа “Гендерга йўналтирилган сиёсат ва бюджетларни илгари суриш: Ўзбекистонда шаффоф, инклюзив ва ҳисобдор бошқарув сари” деб номланади. Уни БМТнинг Аёллар ҳуқуқлари ва имкониятларини кенгайтириш бўйича тузилмаси — БМТ Аёллар амалга оширади. У Иқтисодиёт ва молия вазирлиги билан яқиндан ҳамкорликда олиб борилади.
Гендер сезгир бюджетлаштириш Ўзбекистон қизлари ва аёлларини янада кучли қилади. Шу боис, Европа Иттифоқи БМТ Аёллар билан ҳамкорликда Ўзбекистон молия тизими органларини гендер сезгир бюджетлаштириш амалиётини мунтазам миллий сиёсат ва бюджетлаштириш жараёнларига жорий этишда қўллаб-қувватлаётганидан фахрланади. Бу ёндашув ресурсларни гендер тенгсизликларини бартараф этишга йўналтиришга ёрдам беради, аёллар ва қизлар ҳам давлат хизматлари, иқтисодий имкониятлар ва қарор қабул қилиш жараёнларига тенг кириш ҳуқуқига эга бўлишларини таъминлайди, дейди Европа Иттифоқи элчиси Тойво Клаар.
БМТ Аёллар’нинг Европа ва Марказий Осиё бўйича минтақавий директор ўринбосари Элиза Фернандез Саэнс Ўзбекистоннинг гендер тенглиги бўйича олиб бораётган чораларини эътироф этди.
Ўзбекистон гендер тенглиги бўйича ўз мажбуриятларини бажариш йўлида муҳим қадам ташлади. Ушбу лойиҳа давлат ресурслари гендер тафовутларини бартараф этиш ва кўпинча четда қоладиган гуруҳларни қўллаб-қувватлашга йўналтирилганлигини таъминлаш орқали ҳисобдорликни кучайтиради, дейди БМТ Аёллар’нинг Европа ва Марказий Осиё бўйича минтақавий директор ўринбосари Элиза Фернандез Саэнс.
Молия вазирлиги Давлат бюджети сиёсати департаменти директори ўринбосари Шоҳруҳ Эшонқулов лойиҳанинг аҳамиятига тўхталди.
Режалаштириш ва бюджетлаштириш жараёнларимизга гендер таҳлилини киритиш орқали янада самарали бошқарувни яратамиз — у турли ижтимоий гуруҳларнинг эҳтиёжларига жавоб беради ва ҳеч кимни эътибордан четда қолдирмайди. Гендер сезгир бюджетлаштириш бизга янада шаффоф, инклюзив ва натижага йўналтирилган давлат молиясини таъминлашда ёрдам беради.
Бу эса миллий тараққиёт мақсадларимизга эришиш учун ниҳоятда муҳим. Шу нуқтаи назардан, лойиҳа айниқса аёллар ва қизларнинг ҳаётини яхшилашда адолатлироқ бюджетлаштириш учун амалий ва ўзгаришга олиб келувчи восита бўлиб хизмат қилади, деди Шоҳруҳ Эшонқулов.
БМТнинг Ўзбекистондаги доимий координатори Сабине Маҳл лойиҳа мамлакат бўйлаб аёллар ва эркаклар учун янада самарали натижаларга олиб келишини айтди.
Лойиҳа ҳақида нималар маълум?
Сўнгги 20 йил давомида БМТ Аёллар бутун дунё бўйлаб 80 дан ортиқ давлатни гендер сезгир бюджетларни ишлаб чиқиш ва жорий этиш бўйича қўллаб-қувватлаб келмоқда.
Гендер сезгир бюджетлаштириш — бу гендер тенглиги мақсадларини ҳукумат сиёсати, режалаштириш, бюджетлаштириш, мониторинг, баҳолаш ва аудит жараёнларига тизимли равишда интеграция қилишга қаратилган стратегик сиёсий ёндашув.
У бюджетнинг (даромадлар ва харажатлар) аёллар ва эркакларга нисбатан тақсимот таъсирини таҳлил қилади, ҳар иккала гуруҳ ҳам давлат ресурсларидан тенг даражада фойда кўришини таъминлаш учун маблағларни мослаштиради ёки қайта тақсимлайди. Бу гендер тенглигини илгари сурувчи ҳамда ўзгариш олиб кирувчи воситадир. Бу восита бюджетларни янада самарали, инклюзив қилади ва қизлар, аёллар, ўғил болалар ҳамда эркакларнинг эҳтиёжларини ҳисобга олинишини таъминлайди.
100 дан ортиқ давлат гендер тенглигини таъминлаш, етарли даражада молиялаштирилмаган аёллар ва қизлар учун зарур хизматларга сармоя муаммосини бартараф этиш учун гендер сезгир бюджетлаштириш бўйича ташаббусларни бошлаган. 105 та давлатдан тўпланган маълумотларга кўра, атиги 26 фоизида гендер тенглиги учун бюджет ажратмаларини кузатиш бўйича тўлиқ тизимлар мавжуд.
Изоҳ (0)