Мамлакат халқаро захиралари қиймати бир йилда 14,1 млрд долларга кўпайди. Бу ҳақда Марказий банк эълон қилган статистик рақамлардан кўриш мумкин.
Жорий йил 1 май ҳолатига кўра, республика олтин-валюта захиралари қиймати 49 млрд 255 млн долларга етди. Бу тарихий рекорд кўрсаткич ҳисобланиб, захираларнинг 37 млрд 652 млн доллари олтин ҳиссасига тўғри келган.
Аслида захиралар таркибида олтин миқдори камайиб борган. Қиймат ўсиши эса қимматбаҳо металл нархи кўтарилиши билан боғлиқ. Масалан, 2025 йил бошида 12,3 млн трой унсия (382,5 тонна) олтин захира бор эди. Май ойига келиб, бу кўрсаткич 11,5 млн трой унсияга (356,4 тонна) камайган. Бу тўрт ой ичида тахминан 24,9 тонна олтин сотилганини англатади.
Бир йил илгари, яъни 2024 йил 1 май куни ҳам худди шунча миқдор (11,46 млн трой унсия) қайд этилган.
Халқаро захиралар қиймати 2022 йил майида 35,6 млрд долларни, 2023 йил мос даврида 35,2 млрд долларни ташкил этган. 2024 йил ноябрь ойига келибгина мазкур қиймат 40 млрд доллардан орта бошлаган. Жорий йил май ойи ҳолатига олтин миқдори камайган бўлса-да, қиймати ортиши натижасида ўтган йил ноябригача бўлган кўрсаткичлардан юқори даражага чиқди (37 млрд 652 млн доллари).
2025 йил I чорагида Марказий банк қарийб 3 млрд 570 млн долларлик олтин экспорт қилган. Бу миқдор мамлакат уч ойлик жами экспортининг 44 фоизига тенг. Ўтган йиллар илк чоракларидаги кўрсаткичлар билан таққослаганда мазкур қиймат анча юқори ҳисобланади. Масалан, 2024 йилнинг илк уч ойида республика 2 мрлд 664 млн долларлик олтин сотганди.
Изоҳ (0)