АҚШ президенти Дональд Трамп маъмурияти Гарвард университетини хорижлик талабаларга таълим бериш ҳуқуқидан маҳрум қилди. Бу ҳақда мамлакат ички ишлар вазири Кристи Ноэмга таяниб BBC хабар берди.
Вазир Гарвард университетининг талабалар алмашинуви дастурини амалга ошириш ҳуқуқини берувчи сертификатини бекор қилишни буюрди. АҚШда ўқишни режалаштираётган чет элликлар F ёки М тоифасидаги визани олиши керак. Бундай визани олиш учун эса, фақат талабаларни ва алмашинув дастури иштирокчиларини қабул қилиш учун сертификатланган (SEVP) таълим муассасалари зарур ҳужжатларни тақдим эта олади.
Бу Гарварднинг бундан буён чет эллик талабаларни ўқишга қабул қила олмаслигини англатади. Ҳозирда Гарвардда ўқиётган хорижликлар бошқа университетга ўтишга мажбур бўлади, акс ҳолда улар мамлакатда қолиш ҳуқуқини йўқотади.
Университет маълумотларига кўра, 2024-ўқув йилида Гарвардда 7000 га яқин хорижлик талаба таҳсил олган. Бу умумий талабалар сонининг 27,2 фоизини ташкил этади.
Маъмурият Гарвардни зўравонликни ва антисемитизмни қўзғатиш ҳамда Хитой Коммунистик партияси билан алоқалар ўрнатишда айбдор деб ҳисоблайди, деди Кристи Ноэм.
У университетларга чет эллик талабаларни қабул қилиш ва юқорироқ контракт тўловларидан фойда олиш “ҳуқуқ эмас, балки имтиёз” эканини таъкидлади.
Гарвард университети муносабати
Университет ўз баёнотида Трамп маъмуриятининг бу қадамини ноқонуний деб атади.
Биз Гарварднинг 140 дан ортиқ мамлакатдан келган, университетни ва ушбу мамлакатни беқиёс бойитадиган халқаро талабалар ва олимларни қабул қилиш қобилиятини сақлаб қолишга тўлиқ содиқмиз. Ушбу қасос ҳаракати Гарвард ҳамжамияти ва мамлакатимизга жиддий зарар етказиш билан таҳдид қилади ҳамда Гарварднинг академик ва тадқиқот миссиясига путур етказади, дейилади баёнотида.
Апрель ойининг ўрталарида АҚШ Таълим вазирлиги Гарвард учун федерал грантларни музлатиб қўйишини эълон қилди. Бунга сабаб сифатида университетнинг вазирлик талаблари — хусусан, “талабалар ва ходимларнинг қарашларини аудитдан ўтказиш” бўйича топшириқни бажармагани кўрсатилди.
Хусусан, университетдан шундай тизим ишлаб чиқилиши талаб қилинди, у орқали “Америка қадриятлари ва институтларига душманона муносабатда бўлган чет эллик талабаларни” қабул қилишнинг олди олинади. Шунингдек, антисемитизм ва нафратнинг бошқа шаклларида гумон қилинган дастурларни (ёрдамчи мустақил экспертлар иштирокида) аудитдан ўтказиш ҳам талаб қилинган.
Университет бу талабларни бажаришдан бош тортган, шундан сўнг Трамп Гарвардни махсус солиқ мақомидан ва чет эллик талабаларни қабул қилиш имкониятидан маҳрум қилиш билан таҳдид қилган.
Университет президент маъмурият устидан судга мурожаат қилган ва молиялаштиришни тиклашни талаб қилган. Апрель ойининг охирида Гарвард университети икки ҳисоботни эълон қилди — бири университет муҳитида антисемитизм ва Исроилга қарши кайфиятлар ҳақида, иккинчиси эса антиисломизм ҳақида эди. Ҳар иккала ҳисобот ҳам кампусдаги маданият ва университетнинг вазиятга берган муносабатини танқидий баҳолаган. Ҳисоботлар эълон қилингач, Гарвард президенти Алан Гарбер университет талаба ва профессор-ўқитувчиларнинг ишончини оқлай олмаганидан афсусдалигини билдириб, узр сўради.
Изоҳ (0)