Жорий йил 1 май ҳолатига кўра, Солиқ мобил иловасида 10 миллион 965 минг нафардан ортиқ фойдаланувчи рўйхатдан ўтган. Бу ҳақда Солиқ қўмитаси ахборот хизмати хабар берди.
Қўмита хабарига кўра, илованинг фаол фойдаланувчилари 6,5 миллион нафардан ортиқни ташкил этмоқда. Апрель ойида илова хизматларидан 115,7 миллион марта фойдаланилган. Сотиб олинган товар ва хизматлар чекини рўйхатдан ўтказган фуқароларга ой давомида 115,1 миллиард сўмлик кешбеклар берилган.
Март ойида 103,2 миллиард сўмдан ортиқ кешбек тўланганди. Ўшанда тўланган кешбекларнинг энг катта қисми Тошкент шаҳри (45 миллиард сўм) ҳиссасига тўғри келган.
Қўмита ҳисоботида қайд этилишича, 2024 йилда истеъмолчиларга 1 миллиард дона чек учун 1 триллион 52 миллион сўмдан ортиқ кешбек тўланган. Мазкур даврда тўланган кешбекларнинг энг катта қисмини Тошкент шаҳри аҳолиси олган — 412,2 миллиард сўм. Кейинги ўринларда Тошкент (107,1 миллиард сўм), Самарқанд (93,2 миллиард сўм), Фарғона (75,6 миллиард сўм) ва Андижон (52 миллиард сўм) вилоятлари қайд этилган.
Эслатиб ўтамиз, Ўзбекистонда кешбек тизими президент қарори билан 2022 йил 1 январдан жорий этилган. Қарорда чакана савдо, умумий овқатланиш ва аҳолига маиший хизмат кўрсатиш объектларидаги савдолар учун берилган чеклар Солиқ мобил иловасида сканерланса, харид суммасининг 1 фоизи фуқарога қайтарилиши белгиланган.
Изоҳ (0)