Наманганда қарийб 80 миллион Россия рублини Қирғизистонга ноқонуний ўтказмоқчи бўлган шахсга суд ҳукми ўқилди.
2023 йилнинг декабрь ойида ДХХнинг Наманган вилояти бўйича бошқармаси ходимлари томонидан ўтказилган тезкор тадбирда жуда кўп миқдордаги хорижий валюталарни ноқонуний равишда Қирғизистонга ўтказмоқчи бўлган шахс қўлга олинган эди.
Қирғизистоннинг Жалолобод вилояти Олабуқа тумани билан чегарадош бўлган Наманган вилоятининг Янгиқўрғон тумани ҳудудидан ўтувчи ўзбек-қирғиз давлат чегараси томон ҳаракатланаётган, Наманган шаҳрида яшовчи, 1990 йилда туғилган фуқаро бошқарувидаги Lacetti тўхтатилиб, кўздан кечирилганда, унинг салонида уч дона полиэтилен қопларга жойлаштирилган жами 79 миллион 994 минг 900 рубль борлиги аниқланган.
Таъкидлаш лозимки, мазкур шахс ушбу валюта қимматликларини чегарадан ўтказиб бериши эвазига маълум миқдорда хизмат ҳақи олиши керак бўлган ва бундай ноқонуний ҳаракатни муқаддам 4 маротаба амалга оширган.
Ҳолат юзасидан унга нисбатан жиноят иши қўзғатилиб, тергов ҳаракатлари олиб борилган.
Жиноят ишлари бўйича Янгиқўрғон туман суди томонидан эса ушбу шахс Жиноят кодексининг 25 (жиноятга тайёргарлик кўриш ва жиноят содир этишга суиқасд қилиш), 28 (жиноят иштирокчиларининг турлари), 182-моддаси (божхона тўғрисидаги қонунчиликни бузиш) 2-қисми “а” бандида назарда тутилган жиноятни содир этганликда айбли деб топилиб, унга нисбатан 5 йил муддатга озодликдан маҳрум қилиш жазоси тайинланган.
Тезкор тадбир давомида ундан ашёвий далил сифатида олинган пуллар суд ҳукмига мувофиқ давлат эгалигига ўтказилган.
Эслатиб ўтамиз, 2022 йилда Тошкент аэропортида 27,3 минг доллар ва 1,8 млн рублни тамаки қутиларига яшириб олиб ўтишга уринган шахс ушланган эди.
Изоҳ (0)