Namanganda qariyb 80 million Rossiya rublini Qirg‘izistonga noqonuniy o‘tkazmoqchi bo‘lgan shaxsga sud hukmi o‘qildi.
2023-yilning dekabr oyida DXXning Namangan viloyati bo‘yicha boshqarmasi xodimlari tomonidan o‘tkazilgan tezkor tadbirda juda ko‘p miqdordagi xorijiy valyutalarni noqonuniy ravishda Qirg‘izistonga o‘tkazmoqchi bo‘lgan shaxs qo‘lga olingan edi.
Qirg‘izistonning Jalolobod viloyati Olabuqa tumani bilan chegaradosh bo‘lgan Namangan viloyatining Yangiqo‘rg‘on tumani hududidan o‘tuvchi o‘zbek-qirg‘iz davlat chegarasi tomon harakatlanayotgan, Namangan shahrida yashovchi, 1990-yilda tug‘ilgan fuqaro boshqaruvidagi Lacetti to‘xtatilib, ko‘zdan kechirilganda, uning salonida uch dona polietilen qoplarga joylashtirilgan jami 79 million 994 ming 900 rubl borligi aniqlangan.
Taʼkidlash lozimki, mazkur shaxs ushbu valyuta qimmatliklarini chegaradan o‘tkazib berishi evaziga maʼlum miqdorda xizmat haqi olishi kerak bo‘lgan va bunday noqonuniy harakatni muqaddam 4 marotaba amalga oshirgan.
Holat yuzasidan unga nisbatan jinoyat ishi qo‘zg‘atilib, tergov harakatlari olib borilgan.
Jinoyat ishlari bo‘yicha Yangiqo‘rg‘on tuman sudi tomonidan esa ushbu shaxs Jinoyat kodeksining 25 (jinoyatga tayyorgarlik ko‘rish va jinoyat sodir etishga suiqasd qilish), 28 (jinoyat ishtirokchilarining turlari), 182-moddasi (bojxona to‘g‘risidagi qonunchilikni buzish) 2-qismi “a” bandida nazarda tutilgan jinoyatni sodir etganlikda aybli deb topilib, unga nisbatan 5 yil muddatga ozodlikdan mahrum qilish jazosi tayinlangan.
Tezkor tadbir davomida undan ashyoviy dalil sifatida olingan pullar sud hukmiga muvofiq davlat egaligiga o‘tkazilgan.
Eslatib o‘tamiz, 2022-yilda Toshkent aeroportida 27,3 ming dollar va 1,8 mln rublni tamaki qutilariga yashirib olib o‘tishga uringan shaxs ushlangan edi.
Izoh (0)