Ўзбекистоннинг Саудия Арабистонидаги элчиси Нодиржон Турғунов Saudi Travel Маrket компанияси вакили ва таниқли блогер Сиҳам ал-Масъуд билан учрашув ўтказди. Бу ҳақда “Дунё” агентлиги хабар берди.
Қайд этилишича, учрашувда Ўзбекистон ва Саудия Арабистони ўртасида туризм йўналишида ҳамкорлик алоқаларини жадаллаштириш, Ўзбекистонга келаётган сайёҳлар сонини ошириш, икки давлатда мазкур йўналишда ўтказиладиган йирик тадбирларда соҳа вакилларининг иштирокини таъминлаш масалалари муҳокама қилинган.
Сиҳам ал-Масъуд Ўзбекистон дунёдаги асосий туризм масканларидан бири эканини эътироф этиб, Саудия туркомпаниялари ўзбек томони билан ҳамкорлик ўрнатишга тайёрлигини билдирган. У, шунингдек, блогерлик фаолияти билан шуғулланишини ҳам айтиб ўтган ва Instagram саҳифасида 100 минг, Snapchat ижтимоий тармоғида 22 минг ҳамда Google map’да 4 миллионга яқин обуначиси борлигини маълум қилган.
Уларда, асосан, саудиялик сайёҳлар ташриф буюраётган мамлакатнинг тарихи, маданияти, миллий таомлари, бозорлари ва меҳмонхоналар ҳақидаги муҳим маълумотлар эълон қилиб борилади, — дейди у.
Учрашув якунида Saudi Travel Маrket компанияси вакилининг Ўзбекистонга сафарини ташкил этиш ва мамлакат сайёҳлик салоҳиятига бағишланган тадбирларни биргаликда ташкил этиш тўғрисида келишиб олинган.
Аввалроқ Ўзбекистонга 2024 йилда мингдан ортиқ британиялик турист юборилиши режалаштирилаётгани, мамлакатга 2024 йилнинг январь—март ойларида жами 1 миллион 519,3 минг нафар чет эл фуқаролари туристик мақсадларда ташриф буюргани тўғрисида хабар берилганди.
Изоҳ (0)