Фарғонада “Ҳизб ат-таҳрир ал-исломий” диний экстремистик оқимнинг фаол аъзоси бўлган А.А. 12 йилга озодликдан маҳрум этилди. Бу ҳақда Олий суд матбуот хизмати хабар берди.
Маълум қилинишича, Олтиариқ туманида яшовчи ушбу фуқаро Россияда ишлаб юрган вақтида ислом динига қизиқиши туфайли интернет орқали турли маърузаларни эшитган. Хусусан, у “Ҳизб ат-таҳрир ал-исломий” диний террористик ташкилоти тарафдорларининг Ўзбекистонда мавжуд амалдаги тузумни Конституцияга хилоф равишда ўзгартиришга хизмат қилишга қаратилган маърузаларидаги ақидапарастлик ғоялари билан йўғрилган видео ва аудио материалларни эшитиб, уларнинг таъсирида экстремистик ғояларни қўллаб-қувватлаб келган.
У Telegram орқали оқим тарафдори М. А. билан ёзишмалар олиб борган. “Ҳизб ат-таҳрир ал-исломий” диний экстремистик оқимига аъзо бўлиб, уларнинг китобларидан виртуал таълим олган. Бунинг натижасида диний ақидапарастликка берилиб, унинг ғояларини қўллаб-қувватлаган. Мазкур диний ташкилотга содиқлик қасамёдини қабул қилган ва ойлик даромадидан аъзолик бадали тўлаб келган. Шу билан бирга ижтимоий тармоқларда диний оқимнинг ғояларини фаол тарғиб қилган.
Олтиариқ туманига қайтиб келгач, Telegram’да турли гуруҳларни ташкил қилган ҳамда ўзининг танишларини шу гуруҳга қўшган. Гуруҳда А.А. ақидапарастлик ғояларидан сабоқ бериб келган ҳамда диний оқимнинг материалларини тарқатган.
Ҳуқуқни муҳофаза қилувчи идоралар томонидан ўтказилган тезкор тадбирлар давомида унинг қилмишлари фош бўлган. Телефонидан олинган ашёвий далиллар диний оқимнинг материаллари эканлиги тасдиғини топган.
Жиноят ишлари бўйича Бағдод туман суди ҳукмига кўра, унга 12 йил озодликдан маҳрум этиш жазоси тайинланган.
Изоҳ (0)