Икромжон Турсунов Бухоро вилояти Ички ишлар бошқармаси бошлиғи этиб тайинланди. Бу ҳақда ИИВ матбуот хизмати хабар берди.
Маълум қилинишича, 10 май куни ички ишлар вазири Пўлат Бобожонов иштирокида Бухоро вилоятида жамоат хавфсизлиги ҳамда криминоген вазият барқарорлигини таъминлаш масалаларига оид тезкор йиғилиш ўтказилди.
Йиғилишда ташкилий масала кўрилиб, ички ишлар вазирининг буйруғи билан Бухоро вилояти Ички ишлар бошқармаси бошлиғи лавозимига подполковник Икромжон Турсунов тайинланди.
2023 йилнинг февралидан буён ушбу лавозимда полковник Миржамол Миралимов ишлаб келаётганди.
Икромжон Турсунов тайинловга қадар Сурхондарё вилояти ИИБ бошлиғи биринчи ўринбосари лавозимида ишлаган. 2020 йил февралидан Қашқадарё вилояти ИИБ бошлиғи биринчи ўринбосари лавозимида, ундан аввал эса Жиззах вилояти ИИБ жиноят қидирув бошқармаси бошлиғи лавозимида фаолият юритган.
Изоҳ (0)