Хоразм вилоятида сохта трейдер қўлга олинди. Бу ҳақда “Ҳудуд” информацион дастурида хабар берилди.
Маълум қилинишича, қўлга олинган шахс пулини қисқа фурсатда кўпайтириб беришини айтиб, ижтимоий тармоқлар орқали мингдан ортиқ одамни алдаган.
Бундан бир неча кун олдин битта Telegram каналга аъзо қилиб қўйишди. Трейдинг орқали пулни бир бараварга кўпайтириб бериш ҳақида маълумотлар бор эди. Кўпайтириб олиш мақсадида 20 миллион сўм пулимни ташлаб бердим. Орадан 1 соатча ўтганидан кейин блоклаб қўйишди, деган жабрланувчилардан бири.
ИИВ Киберхавфсизлик маркази етакчи мутахассиси Мақсуджон Мирабдуллаевнинг билдиришича, мингдан ортиқ фуқарони алдаб, сохта трейдерлик фаолияти билан шуғулланиб келган шахс ИИВ тезкор-қидирув департаменти Киберхавфсизлик марказининг ҳудудий бўлинмалари томонидан қўлга олинди.
Хоразм вилоятида ушланган ушбу шахс яшаш манзили кўздан кечирилганда 10 дан ортиқ планшет, 96 та мобил телефон, 1171 дона банк картаси ҳамда 343 та SIM-карта топилган.
Ҳозирда ҳолат бўйича суриштирув ишлари олиб борилмоқда.
Қўлга тушаётган сохта трейдерлар
2024 йилнинг октябрь ойида Тошкентда ўзини трейдер деб таништириб, ўзганинг 7 миллион сўмини ўзлаштирган шахс ушланганди. Шунингдек, Наманганда трейдерлик билан шуғулланиши айтиб, ўзганинг 22 миллион сўмини ўзлаштирган шахс ушлангани ҳақида хабар берилганди. Бундан ташқари, Қашқадарёда ўзганинг пулини алдов йўли билан ўзлаштирган “трейдер” ушланган эди.
Изоҳ (0)