48 ёшли Ўзбекистон фуқароси Шавкат Жазилов суд томонидан умрбод қамоқ жазосига ҳукм қилинди. У 2024 йил май ойида Байтерек туманида тўрт нафар ватандошининг ўлимида айбдор деб топилди. Бу ҳақда “KazTAG” нашри хабар берди.
“Махсус туманлараро жиноят ишлари бўйича суд 48 ёшли Ўзбекистон фуқароси Шавкат Жазиловга ҳукм эълон қилди. 2024 йил май ойида Байтерек туманида даҳшатли жиноят содир бўлди. Ёнғин натижасида тўрт нафар Ўзбекистон фуқароси ҳалок бўлди, яна бири куйиш жароҳатлари олди. Суд ҳукмига кўра, Шавкат Жазилов бир нечта одамни ўлдиришда айбдор деб топилди ва унга умрбод қамоқ жазоси тайинланди”, дейилади хабарда.
У мавсумий ишларга келган бўлиб, жами 15 нафар муҳожир биргаликда вақтинчалик турар жойда яшаган.
Фожиа 2024 йил 9 май куни юз берган. Ўша куни ишчилар улардан бирининг туғилган кунини нишонлаган. Иш материалларига кўра, Жазилов ватандошларига нисбатан зиддиятли муносабатда бўлиб, уларга болта ва кетмон билан таҳдид қилган. Навбатдаги можародан сўнг у бинодан чиқиб, “Ҳозир ҳамманинг жонини оламан” деб айтган ва ёнилғи солинган канистрни олов ёнаётган плитага улоқтирган. Тез алангаланган ёнғин енгил ёнувчи материаллардан қурилган уйни буткул қамраб олган.
Натижада 4 киши ҳалок бўлган, яна бир киши куйиш жароҳатлари олган.
Жабрланувчилар суд жараёнида онлайн иштирок этган. Улар фуқаролик даъвоси билдирмаган, бироқ Жазиловга умрбод қамоқ жазоси берилишини ва у Ўзбекистонга қайтмаслигини талаб қилган. Акс ҳолда, ўзлари жазолашларини айтишган.
Жазилов эса айбини қисман тан олган. У канистрда бензин эмас, сув бор деб ўйлаганини таъкидлаган. Аммо суд бу версияни рад этган.
Изоҳ (0)