Янги ёки аллақачон кийиб юрган пойабзал оёқни шилиб юбориш ҳолатига деярли ҳар биримиз дуч келганмиз. Бундай ноқулайлик фақат кайфиятга таъсир этиб қолмай, тери шикастланишига ҳам олиб келиши мумкин. Аммо бундай вазиятда янги оёқ кийимдан воз кечишнинг ҳожати йўқ. Оёқ уришига қарши бир нечта самарали ечимлар мавжуд.
Нега янги пойабзал тери юзасига ишқаланиб, жароҳатлайди?
Аввало ишқаланиш сабаби нимада эканини аниқлаш лозим. Кўпинча бунга қуйидагилар сабаб бўлади:
мос келмайдиган ўлчам (жуда тор ёки аксинча, жуда кенг оёқ кийим);
қаттиқ материаллар, айниқса товон ёки бармоқлар соҳасида;
нотўғри танланган пайпоқлар;
оёқларнинг терлашга мойиллиги;
оёқ кийим чарм ёки лакланган бўлса бунинг эҳтимоли ошади.
Муаммони қандай бартараф этиш мумкин?
Уйда кийиб, кенгайтириш
Янги пойабзални қалин пайпоқлар билан кийиб, уйда 30–60 дақиқа давомида юриб кўринг. Бир неча марта шундай қилиб кийсангиз, материал юмшайди ва оёғингиз шаклига мослашади. Бу усул айниқса чарм ва замш оёқ кийимларида самара беради.
Спирт ёрдамида оёқ ўлчамига мослаштириш
Агар ишқаланиш давом этса, оёқ кийимнинг ички қисмини бир оз спирт (ёки ароқ) билан намлаб, пайпоқ кийган ҳолда бир оз юринг. Бу материалнинг оёғингизга тезроқ мослашишига ёрдам беради. Лекин лакланган ёки рангли чармга эҳтиёт бўлинг — спирт уларнинг ташқи қопламасига зарар етказиши мумкин.
Товон учун силикон стикерлар
Энг кўп жароҳатланадиган соҳа — товон қисми учун дорихонада сотиладиган махсус силикон ёки гелдан тайёрланган стикерлардан фойдаланиш мумкин. Улар терини ҳимоя қилади ва оёқ кийим катта бўлса, ортиқча бўшлиқни ҳам бир оз тўлдиради.
Тери шикастланишига қарши махсус воситалар
Дорихона ёки спорт дўконларидан махсус стиклар (ишқалашга қарши қаламлар) харид қилишингиз мумкин. Улар терида юпқа ҳимоя плёнкаси ҳосил қилиб, жароҳатни камайтиради.
Материални юмшатиш
Агар оёқ кийим жуда қаттиқ бўлса, ички қисмига чармни юмшатувчи махсус кондиционер ишлатиш тавсия этилади. Уй шароитида эса ички юзани совун ёки мум билан эҳтиёткорлик билан суртиб чиқиш мумкин.
Намликни назорат қилиш
Иссиқлик ва терлаш туфайли оёқ сирғалади, натижада пойабзалдаги тасма ва боғламлар терига қаттиқроқ ботади. Бунинг олдини олиш учун талк, оёқ учун кукун ёки махсус антиперспирантлардан фойдаланиш мумкин.
Қачон оёқ кийимни алмаштириш керак?
Агар юқоридаги усулларнинг бирортаси фойда бермаса, муаммо пойабзалнинг нотўғри шаклида ёки жуда қаттиқ материалида бўлади. Бундай пайтда “ўзи яхши бўлиб кетади” дея вазиятни шундайлигича қолдирмаслик керак. Акс ҳолда тирноқ шикастланиши ёки оёқ деформацияси каби муаммолар пайдо бўлади.
Изоҳ (0)