Микротўлқинли печ бугунги кунда деярли ҳар бир хонадонда мавжуд. Ундан таомни бир неча дақиқада иситиш ёки музлаган гўштни эритишда кенг фойдаланилади. Бироқ кўпчилик уй бекалари микротўлқинли печдан фойдаланишда айрим хатоларга йўл қўяди ва ҳатто фойдаланиш ҳақидаги йўриқнома билан танишиб чиқмайди. Шунингдек, печда жуда кам миқдордаги маҳсулотни иситади. Қуйида бундай одат нимага олиб келиши ва бир стакан сув билан муаммони қандай ҳал қилиш мумкинлиги ҳақида сўз боради.
Микротўлқинли печ қандай ишлайди?
Кўпчилик ҳанузгача микротўлқинли печни бўш ҳолда ишга тушириш мумкин эмаслигини билмайди. Ёки ҳажми жуда кичик маҳсулотларни, масалан, 100 граммли сендвични иситиш ҳам хавфли эканини хаёлига ҳам келтирмайди. Вақт ўтиши билан бундай ҳолатлар печдаги жиддий носозликка олиб келади.
Микротўлқинли печда махсус магнетрон бўлиб, айнан у овқатни иситувчи микротўлқинларни ҳосил қилади. Магнетрон электр кучланишининг юқори интенсивликдаги қисқа импулслари билан бошқарилади. Ҳар бир импулсдан сўнг у микротўлқин ҳосил қилади ва бу тўлқинлар махсус йўналтиргич орқали печнинг ички камерасига узатилади.
Агар печ ичида етарли миқдорда овқат бўлса, микротўлқинлар овқатдаги сув молекулалари билан тўқнашиб, иситиш жараёни бошланади. Аммо печ ичи бўш ёки ичидаги маҳсулот ҳажми жуда кичик бўлса, бундай ҳолда микротўлқинлар сўрилиш учун манба топа олмайди. Улар печ деворларига урилиб, ортга қайтади ва бу “турғун тўлқинлар” деб аталувчи ҳолатга олиб келади. Бундай пайтда микротўлқинли печ ичида учқунлар чиқади. Бундай ҳолат қайта-қайта давом этаверса, магнетрон ишдан чиқиши мумкин.
Сув солинган стакан нима учун керак?
Шу сабабли мутахассислар, агар овқат жуда кам бўлса, печ ичига совуқ сув тўлдирилган стакан қўйишни тавсия этишади. Сув ортиқча микротўлқинларни сўриб олади, бу эса хавфли учқунлар ҳосил бўлишининг олдини олади.
Албатта, микротўлқинли печни бир марта бўш ҳолда ёқиш билан дарров жиддий нарса содир бўлмаслиги мумкин, лекин бу одат такрорланаверса ёки тез-тез оз миқдордаги овқат иситилса, магнетроннинг ишлаш муддати сезиларли даражада қисқаради. Шунинг учун, кейинги сафар фақат битта сендвич иситмоқчи бўлсангиз, ёнига албатта сув солинган стакан қўйишни унутманг.
Изоҳ (0)