Уругвайнинг Пастер институти ва Республика университети олимлари семизликка қарши янги дори воситаси — SANА таблеткасининг биринчи босқич клиник синовларини муваффақиятли якунлади. Бу ортиқча вазнга қарши дунёдаги илк дори бўлиб, у организмда иссиқлик ишлаб чиқарилишини кучайтириш орқали калорияларни ёқади ва очлик ҳиссига таъсир қилмайди.
SANА препарати тадқиқотчилар томонидан асос солинган Eolо Pharmа стартапи томонидан ишлаб чиқилган. Мазкур ихтиро тўлиқ Жанубий Америкада яратилган биринчи семизликка қарши дори воситаси ҳисобланади. Препарат организмдаги ёғ ҳужайраларида креатин алмашинувини кучайтириб, уларни иссиқлик ишлаб чиқаришга ва ҳатто дам олиш ҳолатида ҳам энергия сарфлашга мажбур қилади.
Олимларнинг таъкидлашича, SANА дориси бозорда мавжуд оздирувчи препаратлар (улар GLP-1 рецепторлари асосида ишлаб чиқилади)дан фарқли равишда иштаҳани камайтирмайди, гормонларга таъсир қилмайди ва тўғридан тўғри оқ ёғ тўқималарининг фаолиятини ўзгартиради. Синовлар давомида жиддий ножўя таъсирлар кузатилмади, ҳатто лаборатория сичқонларида мушак массаси камаймай, аксинча, ортгани қайд этилди.
Препаратнинг молекуласи АGAT номли оқсил билан барқарор ковалент бирлик ҳосил қилади ва натижада унинг функцияси узоқ муддат ўз таъсирини йўқотмайди. Аммо бундай бирикма баъзи хавфларни юзага келтириши мумкин. Масалан, агар молекула бошқа оқсиллар билан боғланиб қолса, кутилмаган реакциялар пайдо бўлиш эҳтимоли ошади. Ушбу хусусият препаратни синовдан ўтказишнинг кейинги босқичларида чуқур ўрганилади.
Биринчи босқич синовларида 44 нафар кўнгилли иштирок этган. Иккинчи босқич тестлари 2025 йил охирида бошланиши режалаштирилган бўлиб, унда иштирокчилар сони кўпайтирилади ва 2-тур қандли диабет билан касалланган беморлар ҳам иштирок этади.
Оч қолмасдан ва мушак массасини йўқотмасдан семизликка қарши курашиш — бу илгари фантастик туюлган бўлса, энди илм-фан бу орзуни рўёбга чиқаришга яна бир қадам яқинлашди.
Изоҳ (0)