Футбол бўйича Европа Чемпионлар Лигасининг 1/8 финалидан ўрин олган баҳсда “Реал” “Лейпсиг” устидан 1:0 ҳисобида ғалаба қозонди.
Учрашувнинг 2-дақиқасида немислар бурчак тўпини амалга оширди. Тўп Хавьер Шлагерга тушди. Ярим ҳимоячининг зарбасидан сўнг, тўп Бенямин Шешкога етиб келди ва ҳужумчи боши билан дарвозани ишғол қилди.
Голдан сўнг қанот ҳаками ўйиндан ташқари ҳолат борлигини қайд этиб, байроқчасини кўтарди. Бош ҳакам Ирфан Пелто вазиятни ВАР билан муҳокама қилди ва ён ҳакамининг қарорини тасдиқлади.
Аввалига Шешко ўйиндан ташқари ҳолатда қолгани учун гол бекор қилинди, деб ҳисоблади, лекин такрорий вазиятлардан кўриш мумкинки, Родриго дарвозага ҳужумчидан кўра яқинроқ эди.
“Реал” ярим ҳимоячиси Тони Кроос вазиятга изоҳ берди: “Ўйлашимча, ҳакам футболчи дарвозабон йўлига чиққани учун офсайд белгилади, аммо бу вазиятда посбон тўпга етолмасди, назаримда гол инобатга олиниши керак эди”, — дейди германиялик футболчи.
Кейинроқ маълум бўлишича, ушбу гол бекор бўлишига сабаб Бенямин Ҳенрихс ва Андрей Лунин тўқнашуви бўлган. “Лейпциг” футболчиси “Реал” дарвозабонини туртиб юбориб, унга халақит берганлиги аниқланган.
Ушбу сурат дарвоза ортидаги камерадан олинган. Бу ҳолат фақатгина биринчи бўлим охирларида трансляция режиссёрлари томонидан кўрсатилган.
Собиқ ҳакам Итурралде Гонсалес АS’га берган интервьюсида Ҳенрихснинг қўл билан дарвозабонга бўлган ҳаракати қоидаларга зид эканлигини таъкидлади. “Агар сиз қоидаларга қарасангиз, бу ерда у бузилганини кўришингиз мумкин”, — дейди Гонсалес.
Бошқа бир ҳакам Матеу Лаос бу вазиятдаги голни бекор қилиш хато бўлганини таъкидлади. “Бундай ҳолатлар майдонда бўлади. Айнан шунинг учун ҳам ВАР бор. Бу ерда голни бекор қилиш аҳмоқлик”, — дейди испаниялик арбитр.
Эслатиб ўтамиз, жамоалар ўртасидаги жавоб учрашуви 6 март санасида “Сантяго Бернабеу” стадионида бўлиб ўтади.
Изоҳ (0)