Суперлига. “ОКМК” “Бухоро”ни, “Пахтакор” “Машъал”ни мағлубиятга учратди

Ўзбекистон Суперлигасининг иккинчи давраси бошланди. 1 август, жума куни 16-тур баҳслари доирасидаги дастлабки икки ўйин бўлиб ўтди: “Бухоро” — “ОКМК” ва “Машъал” — “Пахтакор”.

“Бухоро” жамоасининг уй стадионида реконструкция ишлари олиб борилаётгани сабабли, жамоа ўз ўйинларини Қаршидаги “Марказий” стадионда ўтказмоқда. “ОКМК”га қарши ўйин ҳам айнан шу аренада бўлиб ўтди.

Учрашув жуда қизиқарли бошланди. Ҳар икки жамоа биринчи бўлимда навбатма-навбат хавфли ҳужумлар уюштирди. Тайм сўнгида меҳмонлар ҳисобни очди. Рубен Санчеснинг чиройли узатмасини Наоаки Сена гол билан якунлади.

Иккинчи бўлим бошларида “ОКМК” иккинчи марта рақиб дарвозасини ишғол қилди. Бу сафар гол муаллифи бевосита Санчеснинг ўзи бўлди. Якуний ҳисоб — 0:2. Шундай қилиб, Миржалол Қосимов бошчилигидаги “ОКМК” иккинчи даврани ғалаба билан бошлади.

Ушбу уч очко эвазига олмалиқликлар турнир жадвалида 30 очко билан 3-ўринга кўтарилди. “Бухоро” эса 13 очко билан 14-поғонада қолмоқда.

Турнинг иккинчи учрашуви Муборакда бўлиб ўтди. Унда мезбон “Машъал” Тошкентнинг “Пахтакор” клубини қабул қилди. Беллашувда пойтахтликлар минимал 1:0 ҳисобида ғалаб қозонди. Ўйиндаги ягона гол 75-дақиқада Достонбек Ҳамдамов томонидан киритилди.

Мазкур ғалаба орқали “Шерлар” очколарини 29 тага етказиб, турнир жадвалида 4-ўринга кўтарилди. “Машъал” эса 15 очко билан 12-поғонани эгаллаб турибди.

Ўзбекистон Суперлигаси
16-тур

1 август, жума

“Бухоро” — “ОКМК” 0:2
Голлар: 0:1 — Сенага (40), 0:2 — Санчес (53)

“Машъал” — “Пахтакор” 0:1
Голлар: 0:1 — Ҳамдамов (75)