Soliq qo‘mitasi mol-mulk va yer solig‘idan qarzdor tashkilotlar xodimlarini ogohlantirdi

O‘zbekistonda byudjet va boshqa tashkilotlar xodimlarida mol-mulk hamda yer solig‘idan qarzdorlik 563 mlrd so‘mdan ortgan. Bu haqda Soliq qo‘mitasi xabar berdi.

Joriy yil 8-iyul holatiga ko‘ra, 214,4 ming tashkilotning 1 mln nafardan ortiq xodimi yer solig‘idan 348,2 mlrd so‘m, mol-mulk solig‘idan 215,5 mlrd so‘m qarzdor. Shundan eng ko‘p qarzlar (433,7 mlrd so‘m) tijorat tashkilotlari xodimlariga tegishli. Qolganlari byudjet (107 mlrd so‘m) va nodavlat-notijorat tashkilotlari (23 mlrd so‘m) vakillari to‘lamayotgan qarzlardir.

Tijorat tashkilotlari ishchilarining sohalar kesimida yer va mol-mulk solig‘idan eng ko‘p qarzlari quyidagicha:

• Qishloq xo‘jaligi — 107,3 mlrd so‘m ;
• Sanoat — 97,9 mlrd so‘m;
• Savdo — 66,3 mlrd so‘m;
• Qurilish — 63,5 mlrd so‘m.

Xodimlari nisbatan ko‘p soliq to‘lashi lozim bo‘lgan tashkilotlar:

• “Temiryo‘llarinfratuzilma” AJ — 6,5 mlrd so‘m;
• “Olmaliq kon-metallurgiya kombinati” AJ — 6,3 mlrd so‘m;
• “Hududiy elektr tarmoqlari” AJ — 5,7 mlrd so‘m.

Soliq qo‘mitasi tashkilotlar xodimlariga ogohlantirish berib, qarzdorlikni zudlik bilan bartaraf etishga chaqirdi. Soliqlarni o‘z vaqtida to‘lamaslik, kechiktirilgan har bir kalendar kun uchun penya hisoblanishiga sabab bo‘lishini bildirdi. 

“Agar jismoniy shaxsning umumiy soliq qarzi 1 mln so‘mdan oshsa, qarz sud orqali qarzdorning mulki hisobidan undirilishi mumkin. Bu esa qarzdorning mol-mulki xatlanishi va ayrim cheklovlar o‘rnatilishiga sabab bo‘lishi mumkin. Shu sababli soliqlarni o‘z vaqtida to‘lashni unutmang”, deyiladi qo‘mita xabarida.

To‘lovni Soliq mobil ilovasi orqali soliq yoki bank idoralariga bormasdan, masofadan turib amalga oshirish mumkinligi eslatilgan.

Avvalroq 2025-yilning I yarmida O‘zbekistondagi 1 ming 64 ta korxona 13,1 trln so‘mlik soliq bazasini yashirgani fosh etilgani xabar qilingandi. Soliqdan qoshichga uringa mazkur korxonalarga nisbatan jami 2,6 trln so‘m jarima qo‘llanilgan.

Ma’lumot uchun, joriy yil aprelda mamlakatda jami 8,5 trln so‘mlik to‘lanmagan soliqlar borligi aytilgan. Yanvar-iyun oylarida soliq huquqbuzarliklari haqida xabar bergan fuqarolarga 17,7 mlrd so‘m mukofot pullari to‘langani xabar qilingandi.