“Марказий Осиё” халқаро саноат кооперацияси маркази” эркин иқтисодий зонасини ташкил этиш тўғрисида”ги президент қарори қабул қилинди.
Қарорга кўра, “Марказий Осиё” халқаро саноат кооперацияси маркази эркин иқтисодий зонаси ташкил этилади. Марказ фаолиятини бошқариш “Сирдарё” эркин иқтисодий зонаси дирексияси” унитар корхонасига юклатилади.
Марказ ҳудудига саноат корхоналарини ишлаб чиқариш жараёнига жалб этиш ва импорт ўрнини босувчи маҳсулотлар ишлаб чиқаришни йўлга қўйиш орқали саноат кооперацияси кенгайтирилади.
Марказ ҳудудида фақат Ўзбекистон ва Қозоғистонда ишлаб чиқарилган маҳсулотлар ишлаб чиқариш сертификати назорати остида реализация қилинади.
Қозоғистон ва у орқали ташриф буюрувчи чет эл фуқаролари учун марказ ҳудудига махсус назорат ўтказиш пункти орқали визасиз тартибда, шахсни тасдиқловчи ҳужжат билан кириш, 15 кун мобайнида ҳудудда бўлиш ва кирган назорат пункти орқали чиқиш имконияти йўлга қўйилади.
7 август куни Шавкат Мирзиёевнинг Қозоғистонга давлат ташрифи арафасида Остонада Қозоғистон—Ўзбекистон бизнес-форуми бўлиб ўтганди. Унда энергетика, геология, автомобилсозлик, электротехника ва енгил саноат, шунингдек, қурилиш материаллари ва фармацевтика маҳсулотлари ишлаб чиқаришда ҳамкорлик салоҳиятини очишга қаратилган инвестиция битимлари ва савдо шартномалари имзоланди.
Форумда Қозоғистон бош вазири ўринбосари Серик Жумангарин янги қўшма ташаббусларни ҳар томонлама қўллаб-қувватлаш, ўзаро манфаатли лойиҳаларни амалга ошириш учун имтиёзли шарт-шароитлар яратиш истагини қайд этиб, қозоқ бизнесини ноёб имкониятлардан унумли фойдаланишга ва ўзбекистонлик ҳамкасблар билан фаолроқ ҳамкорлик қилишга, янги қўшма корхоналар очиш ва ўзаро манфаатли савдо алоқаларини ўрнатишга чақирди.
Изоҳ (0)