Олий Мажлиснинг бола ҳуқуқлари бўйича вакили Сурайё Раҳмонова 24 июль куни Тошкент вилоятининг Ангрен шаҳрида бўлиб, зўравонлик қурбони бўлган 15 ёшли қиз С.Й. билан боғлиқ вазиятни ўрганди.
Болалар омбудсмани матбуот хизматининг хабар беришича, Сурайё Раҳмонова дастлаб Ангрен шаҳар болалар шифохонасига келиб, қизнинг умумий аҳволи ва даволаниш жараёнини кўздан кечирди, боладаги касалликларнинг кечиши ва муолажаларга оид тиббий ҳужжатлар билан танишди. Вояга етмаган С.Й. билан индивидуал суҳбатлашиб, унинг фикрини ўрганди.
“Таъкидлаш жоиз, шифокорлар томонидан С.Й.даги касалликларни (ўткир артрит, икки томонлама бронхопневмония, оқсил энергетик етишмовчилик, анемия оғир даражаси, сепсис) даволаш учун барча зарурий тиббий чоралар кўрилмоқда. Болада мавжуд қайд этилган касалликлар сурункали тусга эга бўлиб, уларнинг ҳеч бири жиноят ҳодисаси оқибатида юзага келмаган”, дейилади хабарда.
С.Й.га нисбатан содир этилган ҳолат юзасидан 9 апрелда жиноят иши қўзғатилгани, дастлабки тергов ҳаракатлари маълум қилинганди. Болалар омбудсмани дастлабки тергов учун масъулларга вояга етмаган жабрланувчи билан боғлиқ процессуал ва тергов ҳаракатларни олиб боришда боланинг қўшимча стресс ва руҳий травма олишига йўл қўймаслик ҳамда малакали педагог ва психолог иштирокини таъминлаш зарурлигини билдирган.
Сурайё Раҳмонова ўрганиш давомида Ижтимоий ҳимоя миллий агентлигининг Ангрен шаҳар “Инсон” ижтимоий хизматлар маркази мутасаддилари билан ҳам учрашиб, мазкур кейс бўйича амалга оширилган ижтимоий, психологик кўмак чоралари борасида суҳбатлашган.
Қайд этилишича, “Инсон” маркази мутахассислари С.Й. ва унинг оиласи билан узоқ муддат давомида тизимли иш олиб бориб, мураккаб вазиятда бўлган болани ҳимоялаш ва реабилитация қилиш ҳамда оилага ижтимоий кўмак кўрсатиш бўйича давомли комплекс чоралар кўрмоқда.
“Мазкур ҳолат юзасидан ишончли бўлмаган, ҳақиқатга зид манбаларга мурожаат қилишдан тийилган ҳолда, фақат мутасадди давлат органларининг расмий ахборотларига таянишга чақирамиз. Ҳар қандай асоссиз маълумотнинг тарқалиши бола манфаатларига путур етказади”, дея огоҳлантирди болалар омбудсмани.
Ижтимоий тармоқларда ушбу қиз билан боғлиқ ҳолат доирасида унинг ҳаётини сақлаб қолган шифокорга нисбатан шахсий маълумотларни тарқатгани учун прокуратура жиноят иши қўзғатмоқчи эканлиги ҳақида хабарлар тарқалганди. Бош прокуратура мазкур хабарлар мутлақо асоссиз эканлиги, ҳақиқатга тўғри келмаслигини маълум қилган.
Изоҳ (0)