Термиз шаҳрида 29 август куни “Термиз халқаро савдо маркази”нинг расмий очилиш маросими бўлиб ўтди. Бу ҳақда Ўзбекистон ҳукумати матбуот хизмати хабар берди.
Тантанали маросимда бош вазир Абдулла Арипов, Афғонистон бош вазири вазифасини бажарувчи Абдул Ғани Бародар, Озарбайжон бош вазири ўринбосари Шахин Мустафаев, Қирғизистон иқтисодиёт ва савдо вазири ўринбосари Назарбек Малаев, Қозоғистон савдо ва интеграция вазири ўринбосари Қайрат Торебаев ҳамда ҳукумат вакиллари, шунингдек, ўзбек ва афғон томонининг йирик ишлаб чиқарувчилари, тадбирлари иштирок этди.
Сурхондарё вилояти ҳокимлиги ахборотида таъкидланишича, Airitom free zone Ўзбекистон ва Марказий Осиёдаги биринчи эркин савдо зонасидир. Мазкур эркин савдо зонаси Сурхондарё вилояти Термиз туманида, Ўзбекистон ва Афғонистон чегарасида жойлашган бўлиб, қиймати 70 миллион долларни, умумий майдони 36 гектарни ташкил этади.
Ҳудудда Hilton Garden Inn меҳмонхонаси, Akfa Medline замонавий тиббиёт клиникаси, Central Asia University бизнес мактаби, йирик савдо ва хизмат кўрсатиш маркази, ресторанлар, хостел ҳамда йилига 900 минг тонна юк айланмаси қувватига эга логистика маркази ҳамда ишлаб чиқариш корхоналари жамланган.
Халқаро эксперт ва мутахассислар фикрига кўра Airitom free zone эркин савдо зонасига йилига 1,5 миллион ташриф буюрувчилар келиши ҳамда йиллик савдо айланмаси қарийб 1 млрд долларга етказиш салоҳияти мавжудлигини қайд этишган. Шунингдек, зонада барча давлат фуқароларининг 15 кун давомида Ўзбекистонга кириш визасини расмийлаштирмасдан кириш ва чиқиш имконияти, савдо ва хизматларни сотишда мултивалюта тизими ва марказ ҳудудига келувчи товарларни “божхона тўловларисиз” жойлаштириш режими жорий этилган.
Тантанали тадбирда Абдулла Арипов ва Афғонистон муваққат ҳукумати раҳбари вазифасини бажарувчи Абдул Ғани Бародар сўзга чиқиб, халқаро эркин савдо зонаси нафақат икки мамлакат, балки, Марказий Осиё давлатлари ўртасида савдо-иқтисодий алоқаларни янада ривожлантириш, ўзаро товар алмашишда муҳим зонага айланишини ҳамда Карачи—Термиз—Тошкент—Қозоғистон—Россия янги транспорт коридорининг муҳим участкаси бўлиб, Ҳинд океанига чиқиш имконини беришини таъкидлади.
Термиз халқаро савдо маркази президентнинг 2020 йил 12 ноябрдаги фармонига мувофиқ ташкил этилди. 2021 йилда Шавкат Мирзиёев ушбу марказ бош режаси билан танишганди. Халқаро савдо марказининг йиллик савдо айланмаси 500 миллион доллар, хизматлар ҳажми 10 миллион доллар бўлиши ҳисоб-китоб қилинганди.
2024 йилнинг май ойида “Термиз халқаро савдо маркази” эркин савдо зонаси фаолиятини йўлга қўйиш ва ривожлантириш бўйича қўшимча чора-тадбирларга оид президент қарори қабул қилинди. Унга кўра, тадбиркорлик субъектларига Афғонистон фуқаролари, чет эл фуқаролари ва фуқаролиги бўлмаган шахсларни меҳнат фаолиятини амалга ошириш ҳуқуқи учун тасдиқнома олмасдан меҳнат шартномалари асосида ишга қабул қилишга рухсат берилади.
Афғонистон ва Покистон фуқароларига савдо дўконлари, хизмат кўрсатиш ва ишлаб чиқариш учун мўлжалланган бино ва иншоотларни ижарага олиш, шунингдек, истисно тариқасида, мулк ҳуқуқи билан сотиб олиш ҳуқуқи берилади.
Ўзбекистон фуқаролари, чет эл фуқаролари, шунингдек, фуқаролиги бўлмаган шахслар марказ ҳудудига шахсини тасдиқловчи ҳужжат асосида назорат-ўтказиш пунктларида белгиланган тартибда текширувдан ўтказилгандан сўнг киритилади ҳамда уларга марказ ҳудудида ташкил этилган барча хизматлардан фойдаланиш имконияти яратилади.
Изоҳ (0)