Ўзбекистонда электромобилларни қувватлаш ускуналари учун алоҳида ҳисоб юритиш режалаштирилмоқда

Ўзбекистонда электромобилларни қувватлаш ускуналари учун алоҳида ҳисоб юритиш режалаштирилмоқда, деб хабар берди Spot.

“Электромобильлар кўпаймоқда. Бу (электромобилларни қувватлаш ускуналари) бўйича ҳам одамлар қўшимча ҳисоб рақам (очишни) сўрашмоқда. Фуқаролар, бевосита, яшашлари учун алоҳида, электромобиллар учун алоҳида электр энергиясидан фойдаланишни хоҳлашмоқда. Биз ҳисоб очишда Тошкент ва Самарқанд шаҳарларида муаммога учраяпмиз”, деган “Ҳудудий электр тармоқлари” бошқарув раиси биринчи ўринбосари Алвар Ғайбуллаев 11 июль куни ўтказилган матбоут анжуманида.

Унинг тушунтириш беришича, ўрнатилган битта ҳисоблагич битта фидерда битта трансформатордан электр энергиясини олади. Шундай жойлар бўляптики, электр энергияси йўқлиги учун икки томонлама, уч томонлама улашади.

“Лекин унинг ҳисоби биздан (‘Ҳудудий электр тармоқлари’дан) чиқиб кетади. Чунки битта ҳисоблагич битта трансформатордаги маълумот йиғувчи концентраторга боғланган. Мана шу жиҳатлари бор, буларнинг олдини олиш учун биз барча таклифларни берганмиз”, дейди у.

Унинг қайд этишича, ҳозирда жойларда электромобиллар масаласи бўйича ишлар олиб борилмоқда. Бироқ электромобилларга электр энергиясини етказиб бериш фақат ҳисоб рақам очиш билан боғлиқ эмас.

“Бутун тизимдаги барча ускуналарни, ҳатто симнинг кесишмасигача кенгайтиришимиз керак. Нимага? Масалан, ҳовлиларига қувватлаш ускуналарини ўрнатган фуқаролардан электромобилларни қувватлаганда симлар қизиб, ёниб кетиши ҳақида саволлар бўлади. Ўтган йили аномал совуқ пайтида ҳам нима учун кўп қаватли биноларда кабеллар ёниб кетди? Бизларда 70−80 йилларда қурилган уйлар симининг кесишмаси уйдаги битта музлаткич ва телевизорга ҳисоб-китоб қилинган ва ўша пайт учун бу тўғри келарди”, дея тушунтирди Ғайбуллаев.

Бироқ ҳозир кўп қаватли уйларда ҳар битта хонага кондиционерлар ўрнатилади ва бунга йўлаклардаги симлар кесишмаси тўғри келмайди. Улар қизиб кетиши ёки ишдан чиқиши мумкин.

Бу каби симларни бутунлай алмаштириш учун лойиҳа институтларига топшириқлар берилган. Хусусан, электромобилларни қувватлантириш борасида симнинг йирик линияларда ҳам кесишмасини ҳисобга олиш топширилган.

Шахсий электромобилларни қувватлантириш ускуналарини ўрнатиш бўйича иккинчи тариф гуруҳига белгилаш бўйича ҳисоб-китоб ишлари амалга оширилмоқда. Унинг қайд этишича, бу бўйича топшириқ берилган бўлиб, янги тартиб 2024 йилдан йўлга қўйилиши мумкин.