Dynamic owers — динамик осмонўпар бинолар концепциясини тақдим этган Девид Фишер бундай лойиҳани Тошкентда амалга оширишга тайёрлигини билдирди. Бу ҳақда Инвестициялар, саноат ва савдо вазирлиги матбуот хизмати хабар берди.
Унинг сўзларига кўра, бундай биноларни қуриш осонроқ, арзонроқ ва тезроқ, чунки барча қаватлар унификация қилинган ва заводда йиғилади. Бу юқори сифат, энергия самарадорлиги ва минимал фойдаланиш харажатларини таъминлайди.
Динамик биноларга эга ноодатий лойиҳа тез орада Американинг йирик шаҳарларидан бирида амалга оширилади ва бир вақтнинг ўзида бундай лойиҳа Ўзбекистонда ҳам бошланиш эҳтимоли мавжуд. Лойиҳа харажатларнинг 85 фоизигача қопланадиган Италия экспорт кредити орқали молиялаштирилиши режалаштирилган.
“Ҳеч ким ҳатто архитектура учун ҳам ортиқча пул тўлашни хоҳламайди. Одамлар ихчам квартираларни танлашади, лекин қулай шаҳар муҳити ва экотизимни талаб қилишади”, деган Dynamic Architecture асосчиси Давид Фишер Тошкент Халқаро Инвестициялар форумининг тўртинчи кунида.
Бельгиянинг қурилиш бўйича BЕСIX Group компанияси бош директори Филипп Дессой ўз нутқида минтақада қурилиш сифати босқичма-босқич яхшиланиб бораётгани, аммо мақбул даражага эришиш учун ҳали катта йўл босиб ўтиш кераклигини таъкидлади.
“Биринчи мартаданоқ сифатли қурилмаса, келажакда қайта қуриш ва харажатлар бўлиши муқаррар. Бу тежаш эмас, балки кечиктирилган зарар”, деган у.
Шунингдек, хавфсизлик, айниқса, кўп қаватли биноларни қуришда муҳимлигини таъкидлаб, Ўзбекистонда ёш ва салоҳиятли меҳнат ресурслари мавжудлигини профессионалликни ошириш ва янги стандартларни жорий этиш учун асос сифатида ижобий баҳолади.
Турли мақсадлар учун объектларни яратишга ихтисослашган кўп тармоқли холдинг компанияси — Spectrum Group бошқарувчи ҳамкори Владимир Иванов келажакдаги мегаполислар фақат инвесторлар учунгина эмас, балки энг аввало одамлар учун яратилиши кераклигини алоҳида таъкидлаган.
У шунингдек, аҳоли зичлиги паст бўлган шароитда шаҳар инфратузилмаси қимматга тушишини таъкидлаб, лойиҳачиларни макон, иқтисодиёт ва барқарорлик ўртасидаги мувозанатни сақлашга чақирди.
Dynamic Tower бу ҳаракатланувчи (айланадиган) осмонўпар бино бўлиши режалаштирилган футуристик архитектура лойиҳасидир. Уни италиялик архитектор Давид Фишер лойиҳалаштирган. Ҳар бир қават мустақил равишда ўз ўқи атрофида айланиши мумкин. Бу бинога доимо ўзгарувчан фасад беради — у бир зумда бошқа кўринишга эга бўлади. Яшовчилар ўз хоналарини истаган томонга қаратиб айлантира олади.
Изоҳ (0)