Тошкент шаҳар судининг Жиноят ишлари бўйича апелляция инстанцияси ЖИБ Тошкент шаҳар суди Жиноят ишлари бўйича судлов ҳайъатининг 2024 йил 26 февралдаги ҳукмини ўзгаришсиз қолдирди. 7 нафар судланувчи томонидан киритилган апеллация шикояти қаноатлантирмасдан қолдирилди. Бу ҳақда судда қатнашган “Дарё” журналисти хабар берди.
Сардор Кариевнинг онаси Мунира Кариева томонидан суднинг депозит ҳисоб рақамига тўланган 2,5 миллиард сўм маблағ жабрланувчиларнинг қонуний вакилларига тенг миқдорда тақсимланиши белгиланди.
Эслатиб ўтамиз, апелляция шикояти судга 20 йил муддатга озодликдан маҳрум қилинган С.Р.П., 18 йил муддатга озодликдан маҳрум қилинган Сардор Кариев ва унинг ҳар бири 16 йил муддатга қамалган ўринбосарлари — А.Азимов ва Н.Мусаев, 16,6 йилга озодликдан маҳрум этилган Ш.Шодманов ҳамда 2 йил муддатга озодлиги чекланган Ш.Абдуғаниев ва И.Мирзаёқубов томонидан киритилганди.
Шунингдек, “Док-1 Макс” ишини кўриб чиққан судлов ҳайъати сиропдан заҳарланиб вафот этган 68 нафар боланинг қонуний вакилларига 6 нафар судланувчи ҳисобидан солидар тартибда 1 миллиард сўмдан товон пули ундирилишини белгилаганди. Оғир тан жароҳати олиб ногирон бўлиб қолган 16 нафар ва енгил тан жароҳати олган жабрланувчиларнинг қонуний вакилларига эса 500 миллион ва 200 миллион сўм миқдорида товон пули ундириладиган бўлганди.
Изоҳ (0)