Шавкат Мирзиёевнинг таклифига биноан Қирғизистон президенти Садир Жапаровнинг давлат ташрифи якунланди. Бу ҳақда Президент матбуот хизмати хабар берди.
Икки кунлик ташриф доирасида олий даражадаги музокаралар бўлиб ўтди, уларнинг якунида етакчилар кенг қамровли стратегик шериклик муносабатларини янада чуқурлаштириш ва кенгайтириш тўғрисида қўшма баёнотни имзолади.
Икки томонлама ҳужжатларнинг салмоқли тўплами қабул қилинди. Энергетика, автомобилсозлик ва тўқимачилик саноатида йирик қўшма лойиҳаларга старт берилди.
Давлат раҳбарлари Ўзбекистон ва Қирғизистон санъат усталарининг концертини томоша қилди.
Бугун етакчиларнинг мулоқоти Хивада давом этди. “Хива гиламлари” комбинатининг ишлаб чиқариш қувватлари, Made in Uzbekistan бренди остидаги маҳсулотлар кўргазмаси билан танишилди.
Президентлар рафиқалари билан биргаликда қадимий Хива шаҳрининг тарихий-меъморий дурдоналарини ҳам зиёрат қилди.
Ташриф тадбирлари якунлангач, Шавкат Мирзиёев рафиқаси билан Урганч халқаро аэропортида президент Садир Жапаров ва рафиқасини кузатиб қўйди.
Шундан сўнг давлат раҳбари Тошкентга жўнаб кетди.
Изоҳ (0)