Нигерияда сўнгги кунларда ёғган кучли ёмғир оқибатида юзага келган тошқин камида 47 кишининг умрига зомин бўлди, 56 мингдан ортиқ одам эса бошпанасиз қолди. Бу ҳақда маҳаллий нашрларга таяниб, Anadolu хабар берди.
Расмий маълумотларга кўра, тошқин 339 та маҳалла ва қишлоқдаги 7754 та хонадонга зарар етказган. 30 киши уй томининг босиб қолиши оқибатида, яна 17 киши эса сувда чўкиб, ҳалок бўлган. Бундан ташқари, 70 киши жароҳатланган, 257 бош қорамол нобуд бўлган.
“Бир неча дақиқада ҳамма нарсани сув олиб кетди. Энди оилам билан вақтинча мактаб биносида яшаяпмиз. Бизга озиқ-овқат ва дори-дармон зарур”, деди Доссо провинциясида яшовчи 45 ёшли Амина Умар.
Бошқа бир жабрланган, 60 ёшли деҳқон Мусса Ибраҳим эса шундай деди:
“Йиллар давомида меҳнат қилиб қурган уйимдан асар ҳам қолмади. Ҳамма мол-ҳолим сувда оқиб кетди. Биз энди қандай яшашни билмаймиз”.
Ҳукумат тошқиндан зарар кўрганларга ёрдам кўрсатиш учун 21,3 миллион доллар ажратганини маълум қилган. Тошқиннинг олдини олиш бўйича миллий қўмита эса 3776 оилага озиқ-овқат тарқатишни бошлаган. Мутахассисларнинг таъкидлашича, иқлим ўзгариши туфайли ёғингарчилик ритмининг кескин ўзгариши Африкада тошқинни энг хавфли табиий офатлардан бирига айлантирмоқда. Кучли ёмғир 2024 йилда Нигериянинг 8 та ҳудудида қарийб 1,5 миллион кишининг ҳаётига салбий таъсир кўрсатган.
Нигерия Африканинг ғарбий қисмида жойлашган ва иқлими асосан экваториал ва тропик бўлиб, ҳудудларга қараб фарқланади:
Жанубий қисм – экваториал иқлим ҳукм суради. Бу ерда намлик юқори, йил бўйи иссиқ ва сернам бўлади. Ёмғир мавсуми мартдан октябргача давом этади. Ўртача ҳарорат 25–28 °C. Иқлим ўзгариши бу ерда денгиз сатҳи кўтарилиши ва сув тошқинини кучайтирмоқда. Кўплаб қишлоқлар сув остида қолмоқда, инфратузилма зарар кўрмоқда. Нефть қазиб олинадиган делта ҳудуди энг кўп зарар кўрмоқда.
Марказий қисм – саванна иқлими. Бу ерда қуруқ ва ёмғирли мавсумлар аниқ кўзга ташланади. Ёмғир апрель октябрда ёғади, ноябрь–март ойларида эса қуруқ ҳарматтан шамоли эсади (қуруқ ва чангли шамол). Ҳозирда ёмғир мавсумидаги беқарор тарздаги ёғин туфайли қишлоқ хўжалиги издан чиқмоқда. Бир йили ҳаддан ташқари ёмғир ёғиб, тошқин бўлса, бошқа йили қурғоқчилик кузатилади.
Шимолий қисм – тропик чўл ва ярим чўл иқлими. Жуда иссиқ ва қуруқ бўлиб, баъзи жойларда ёзда ҳарорат 40 °C дан ҳам ошади. Ёмғир жуда кам ёғади. Иқлим ўзгариши оқибатида бу ҳудудларда чўлланиш ва қурғоқчилик кескин кучайган. Яйловлар қуриб, оқибатда чорвачилик ва деҳқончиликка катта зарар етмоқда. Кўплаб аҳоли жанубга кўчиб кетишга мажбур бўлмоқда.
Изоҳ (0)