Европа Украинага АҚШдан кўра кўпроқ ҳарбий ёрдам берди

Киэл (IfW) Жаҳон иқтисодиёти институтининг Ukraine Support Tracker лойиҳаси маълумотларига кўра, Россиянинг Украинага қарши уруши бошланганидан буён Европа мамлакатларининг Киевга мудофаа саноати орқали кўрсатган ҳарбий ёрдами Америка Қўшма Штатлариникидан ошиб кетди. Бу ҳақда DW нашри хабар берди.

Манбага кўра, 2025 йилнинг июнь ойига келиб, Европа давлатларининг Украинага ажратган ҳарбий ёрдам миқдори 35,1 миллиард долларга етган. Бу эса АҚШнинг Украинага кўрсатган ёрдам миқдоридан 4,4 миллиард долларга кўп демакдир.

Қайд этилишича, Европа давлатлари томонидан май ва июнь ойларида ажратилган 10,5 миллиард долларнинг 4,6 миллиарди мудофаа саноатига йўналтирилган.

“Европа ҳозирда АҚШдан кўра кўпроқ янги ҳарбий техника харид қилмоқда. Бу эса захиралардан етказиб бериш ўрнига саноат ишлаб чиқариш фойдасига аниқ бурилиш бўлаётганини кўрсатади”, деган Ukraine Support Tracker лойиҳаси раҳбари Таро Нисикава.

Тадқиқот муаллифлари май ойида Дональд Трамп илк бор Украинага катта миқдорда қурол етказганини қайд этган. Бироқ бу ҳарбий ёрдам эмас, балки Украинанинг ўзи молиялаштириши керак бўлган савдо келишувларидир.

Европа давлатлари эса АҚШга тескари равишда кенг қамровли ҳарбий ёрдамни давом эттирди. Германия 5 миллиард евролик ҳарбий ёрдам пакетини ажратди. Шунингдек, Норвегия 1,5 миллиард евро, Бельгия 1,2 миллиард евро, Нидерландия, Буюк Британия ва Дания эса 500–600 миллион евро миқдорида Украинага ҳарбий кўмак берди.

Катта еттилик (G7) мамлакатлари томонидан ажратилган 6,3 миллиард еврога яқин молиявий ёрдам асосан Россия Марказий банкининг музлатилган активларидан тушган даромадлар ҳисобидан молиялаштирилган. Нисикаванинг таъкидлашича, Россия активларидан тушаётган даромад Украинани тиклаш ва иқтисодиётга тушаётган юкни камайтириш учун ишлатилмоқда.

Ukraine Support Tracker лойиҳаси раҳбарининг сўзларига кўра, 2024 йилнинг октябрида ваъда қилинган маблағларнинг тўланиши қанча давом этиши борасида саволлар пайдо бўлмоқда. Чунки донор мамлакатларда маблағ камайиб бормоқда.

Ukraine Support Tracker лойиҳаси Россиянинг тажовузи бошланганидан буён Украинага ваъда қилинган ҳарбий, молиявий ва гуманитар ёрдамни кузатади ва миқдоран баҳолайди. Лойиҳа маълумотлар базасида 41 давлат ҳисобга олинган бўлиб, улар орасида Европа Иттифоқи мамлакатлари, G7 аъзолари, Австралия, Жанубий Корея, Туркия, Норвегия, Янги Зеландия, Швейцария, Хитой, Тайван, Ҳиндистон ва Исландия каби давлатлар мавжуд.

Маълумот манбаси сифатида ҳукуматларнинг расмий баёнотлари ва халқаро ОАВ хабарлари ишлатилади.