Дональд Трамп маъмурияти АҚШ давлат департаменти бюджетини икки баробар қисқартириш, дипломатлар ва элчихоналар сонини камайтириш, шунингдек, БМТ ва НАТО каби халқаро ташкилотларни молиялаштиришни тўхтатишни таклиф этди. Бу ҳақда Associated Press (AP) агентлиги хабар берди.
Улар АҚШ Маъмурий-бюджет бошқармасининг ((Office of Management and Budget, OMB) 2026-молиявий йил, яъни 2025 йил 1 октябрдан бошланадиган давлат департаменти бюджети тўғрисидаги ҳужжатига ҳавола қилмоқда. Молиялаштириш 50 фоизга ёки тахминан 30 миллиард долларга қисқартирилиши режалаштирилмоқда.
Ҳужжат билан USAID орқали хорижий давлатларга кўрсатиладиган 52 миллиард долларлик ёрдамни икки бараварга қисқартириш, давлат департаменти ва умуман USAID орқали бериладиган хорижий ёрдамни чоракдан кўпроққа камайтириш, ОИВ, сил ва безгакка қарши курашдан ташқари глобал соғлиқни сақлаш дастурларини молиялаштиришни тўхтатиш, БМТ ва НАТО каби бошқа йирик нодавлат ташкилотларни молиялаштиришни бекор қилиш, афғон иттифоқчиларини кўчириш идорасини ёпиш ҳамда қочқинлар ва иммиграция бўйича бир қатор дастурларни қисқартириш таклиф этилмоқда.
Ташаббус билан таниш бўлган юқори лавозимли америкалик амалдор уни харажатларни қисқартириш бўйича “дадил” деб баҳолади. Маъмурият якуний қарорлар ҳали қабул қилинмаганини таъкидламоқда. Трампнинг биринчи президентлик муддатида ҳам харажатларни қисқартиришга ўхшаш уринишлар бўлган, бироқ ўшанда АҚШ Конгресси бу ғояга қарши чиққан эди.
Reuters маълумотларига кўра, Оқ уй АҚШнинг хориждаги, асосан Африка ва Европадаги 10 та элчихонаси ва 17 та консуллигини ёпишни таклиф этмоқда.
Агентликнинг таъкидлашича, ҳужжат дастлабки хусусиятга эга бўлиб, эҳтимол давлат департаментининг ўзи ҳам, 2026 йилги давлат бюджетини тасдиқлаши керак бўлган АҚШ Конгресси ҳам уни маъқулламайди. “Молиялаштириш бўйича якуний қарорлар ҳали қабул қилинмаган”, деди бошқарма вакили.
АҚШ Соғлиқни сақлаш ва ижтимоий хизматлар вазирлиги раҳбари кичик Роберт Кеннеди соғлиқни сақлаш тизимини умумий қайта қуриш доирасида 10 минг ходимни қисқартириш режалаштирилаётганини эълон қилганди.
Американинг Challenger, Gray&Christmas ишга жойлаш компаниясининг ҳисоб-китобларига кўра, сўнгги икки ой ичида АҚШ ҳукуматининг самарадорлик департаменти (DOGE) фаолияти натижасида мамлакатдаги 27 та идорада 280 мингдан ортиқ федерал ходим ва пудратчилари ишдан бўшатилган.
Изоҳ (0)