Олмалиқ кон-металлургия комбинати таркибидаги 3-мис бойитиш фабрикаси қурилишида ишлаётган ишчилар Ўзбекистон мустақиллигининг 33 йиллигини пулсиз кутиб олгани хабар берилганди.
Мурожаатчиларнинг “Дарё”га билдиришича, 7—8 сентябрь кунлари фабрикани қураётган компания — Enter Engineering ишчиларига маош тарқатган.
![](/static/2024/09/08/photo_2024-09-07_16-11-22-fkLGDz4N.jpg)
“Май ойининг 30 фоиз қолдиғи ва июнь ойи маошимизнинг 70 фоизини беришмоқда. Борига шукр”, дейди бу ҳақда таҳририятга маълум қилган ишчи.
![](/static/2024/09/08/photo_2024-09-07_17-19-03-v9jIDDZx.jpg)
Мурожаатчиларнинг билдиришича, маошлар дастлаб кеча, 7 сентябрь куни Олмалиқ 3-мис бойитиш фабрикаси қурилишида ишлаётган ишчиларга, кейин Самарқанд ва Қоракўлдаги ишчиларга тарқатилган.
![](/static/2024/09/08/photo_2024-09-08_09-32-09-Du79QxIm.jpg)
Яна бир мурожаатчининг айтишича, унинг турмуш ўртоғи фақатгина июнь ойи учун маошининг 70 фоизини олган. Май ойида қолиб кетган қисми берилмаган.
![](/static/2024/09/08/photo_2024-09-08_09-36-59-ZpDEESsd.jpg)
“Ойликни шунақа бўлиб-бўлиб баракасиз қилиб ташлашади. Турмуш ўртоғим бугун июнь ойи маошининг 70 фоизини олиб келганди. Рўзғор қилдик ва иссиқ кийимлар олдик. Пул тугади”, дейди у.
![](/static/2024/09/08/photo_2024-09-08_18-58-24-_37mgPMr.jpg)
Аввалроқ компаниянинг исм-фамилиясини очиқласа, ишдан бўшатилиши ёки босимга учрашидан қўрққан ходимлари уларга 2024 йилнинг май ойи учун “аванс” берилганини, ўшандан бери маошсиз ишлаб келаётганини айтганди.
Олмалиқ кон-металлургия комбинати ахборот хизматининг “Дарё”га билдиришича, комбинат таркибидаги 3-мис бойитиш фабрикаси қурилиши Enter Engineering компанияси томонидан бажарилмоқда. Ишчиларига маошини ўз вақтида бермаслиги билан жамоатчиликка яхши таниш бўлган мазкур компания ахборот хизмати “Дарё” сўровига жавоб берар экан, маошлар секин-аста берилаётганини айтиб, шу мавзуни ҳозирча олиб чиқмаслик ҳақида маслаҳат бериш билан чекланганди.
Изоҳ (0)