Европа Россиядан LNG импортини кескин оширгани аниқланди

Россиянинг Украинага кенг кўламли бостириб кириши фонида Европа Россиядан суюлтирилган газ (LNG) импортини ўтган йилнинг шу даврига нисбатан 42 фоизга оширди. Бу ҳақда Unian хабар бермоқда.

Financial Times маълумотларига кўра, 2022 йилда Россиядан олиб келинган LNG ушбу ёқилғининг Европа денгиз импортининг 16 фоизини ташкил қилади. Хом ашёнинг деярли ҳаммаси Франция, Бельгия, Испания ва Голландияга етказилган.

Қайд этилишича, Россия Европага 17,8 миллиард куб метр LNG экспорт қилди ва минтақадаги иккинчи йирик етказиб берувчига айланди.

Биринчи ўринни 42 фоизлик улуш билан АҚШ, учинчи ўринни 13,7 фоиз билан Қатар эгаллаган.

Умумий ҳажми 17,8 миллиард кубометр бўлиб, ҳозиргача қувурлар орқали етказилган 62,1 миллиард куб метр газнинг кичик бир қисмини ташкил этади.

Refinitiv таҳлилчиларига кўра, йил бошидан буён Европа рекорд даражадаги 111 миллиард куб метр LNG импорт қилди, бу ўтган йилга нисбатан қарийб 70 фоизга кўпдир.

Аввалроқ Япония LNG учун жаҳонда рақобат кучайиши ҳақида огоҳлантираётгани ҳақида хабар берилганди.