Олий Мажлис Сенати сайтига ҳужум уюштирган шахсларга жиноят иши қўзғатилди. Бу ҳақда ИИВ Тергов департаменти матбуот хизмати хабар берди.
Олий Мажлис Сенати сайти 2 ноябрь куни хакерлар ҳужумига учраган эди. Ушбу ҳолат юзасидан олиб борилган терговга қадар текширув вақтида аниқланишича, 2022 йилнинг сентябридан бошлаб Норин тумани Улуғбек кўчасида яшовчи, вояга етмаган 16 ёшли М.Б. бошқалар билан олдиндан ўзаро жиноий тил бириктириб, бир гуруҳ бўлиб, интернет ижтимоий тармоғи орқали киберҳужум уюштиришга оид материалларни кўриш орқали, ушбу йўналишда ноқонуний хатти-ҳаракатларни ўзлаштириб олиб, 2 ноябрь куни Олий мажлис Сенатига тегишли бўлган «www.senat.uz» веб-сайтига ҳамда бошқа сайтларга ноқонуний киберҳужумлар амалга оширган.
Мазкур ҳолат юзасидан Норин тумани ИИБ ҳузуридаги Тергов бўлинмаси томонидан Жиноят кодексининг 278-2-моддаси 2-қисми «а» банди (компьютер ахборотидан қонунга хилоф равишда (рухсатсиз) фойдаланиш) билан жиноят иши қўзғатилган.
Ушбу моддада кўрсатилган жиноятни содир этганлар БҲМнинг 100 бараваридан 300 бараваригача (30 миллион сўмдан 90 миллион сўмгача) миқдорда жарима ёки бир йилдан икки йилгача ахлоқ тузатиш ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади.
Ҳозирда жиноят иши бўйича келгуси тергов ҳаракатларни амалга ошириш мақсадида ИИВ ҳузуридаги Тергов департаменти иш юритувига қабул қилинган.
Қайд этилишича, тергов якунига кўра барча айбдорларга қонуний чора кўрилиши таъминланади.
Мавзуга доир: Сенат сайтига 14 ёшли бола эмас, бошқа бир хакер бузиб киргани маълум қилинди (видео)
Изоҳ (0)