«Дарё» нашри 28 сентябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Канада бош вазири референдумлар туфайли Россияга қарши янги санкциялар киритилишини эълон қилди
Канада қисман тан олинган Донецк ва Луганск халқ республикалари, шунингдек, Украинанинг Запорожье ва Херсон вилоятларидаги референдумлар туфайли Россияга қарши янги санкциялар киритади. Бу ҳақда мамлакат бош вазири Жастин Трюдо маълум қилди.
Сиёсатчининг қўшимча қилишича, Канада ва унинг халқаро шериклари Украинани ўз ҳудудий яхлитлиги ва суверенитети учун курашда бундан кейин ҳам қўллаб-қувватлашда давом этади. «Украинанинг ҳудуди Украина ихтиёрида қолади», — дея хулоса қилди Трюдо.Украина ҳудудларидаги референдумлар юзасидан худди шундай позицияни Еврокенгаш раҳбари Шарл Мишел ҳам айтиб ўтган эди. «Сохта референдум. Сохта натижалар. Биз унисиниям, бунисиниям тан олмаймиз», — деб ёзди у Twitter’да.
Референдумлар
Россия таркибига кириш ҳақидаги референдумларда овоз бериш 27 сентябрь куни якунланди. 28 сентябрь куни эрталаб Донбасс сайлов комиссиялари овозларнинг 100 фоизи кўриб чиқилганидан кейин референдумлар натижаларини эълон қилди. Уларнинг айтишича, ЛХР сайловчиларининг 98,42 фоизи, ДХР электоратининг 99,23 фоизи, Запорожье ва Херсон вилоятлари босиб олинган ҳудудлари аҳолисининг эса тегишли равишда 93,1 фоизи ва 87,05 фоизи Россия таркибига қўшилишни ёқлаб овоз берган
Сўнгги маълумотларга кўра ЛХР ва Херсон вилояти раҳбарлари Путинга мурожаат қилиб, Россия таркибига қабул қилишни сўраган
АҚШ элчихонаси америкаликларни зудлик билан Россияни тарк этишга чақирди
АҚШнинг Москвадаги элчихонаси Россиядаги ватандошларига мурожаат қилиб, зудлик билан мамлакатни тарк этишга чақирди, деб хабар бермоқда «Коммерсантъ».
Дипломатик ваколатхона маълум қилишича, Россияда эълон қилинган қисман сафарбарлик туфайли, қўш фуқароликка эга одамлар армияга чақирилиши мумкин. Ҳозирча тижорат сафарлари учун чекланган имкониятлар мавжуд бўлиб турибди», — дейилади элчихона хабарида.
Аввалроқ Эстония, Польша ва Болгария Ташқи ишлар вазирликлари ўз фуқароларидан Россия ҳудудини тарк этишни сўраб баёнотлар тарқатган эди.
Зеленский референдумлар тан олинса, Путин билан музокаралар ўтказмаслигини айтди
Зеленский референдумлар тан олинса, Путин билан музокаралар ўтказмаслигини айтди
Украина президенти Владимир Зеленский, агар Россия ДХР, ЛХР ҳамда Херсон ва Запорожье вилоятларининг ўз назорати остидаги ҳудудларида ўтказилган референдумлар натижаларини тан олса, президент Владимир Путин билан «гаплашадиган гапи бўлмаслиги»ни маълум қилди. Бу ҳақда у БМТ Хавфсизлик кенгаши мажлисида видеоалоқа орқали сўзлаган нутқида айтиб ўтди.
Айни вазиятда Украина ҳукумати, ҳарбий ҳолат тугагунга қадар Россияга товарлар экспортини бутунлай тақиқлади.
«Ходимларнинг ҳаракатларида жиноят аломатлари йўқ деб топилган». ИИБ ходимларининг зўравонлигига изоҳ берилди
Фарғона вилоятида икки нафар ИИБ ходими фуқарони аввалига бўғиб, сўнгра тепкилагани кўринган видео тарқалганди. Ички ишлар вазирлиги ахборот хизмати раҳбари Шоҳрух Ғиёсовнинг маълумот беришича, воқеа юзасидан суд қарори ҳам чиққан.
мазкур жиноят иши 2022 йилнинг 23 август куни Жиноят ишлари бўйича Фарғона вилояти судида апелляция тартибида кўриб чиқилиб, ходимларнинг ҳаракатларида жиноят аломатлари йўқ деб топилган ва оқлов ҳукми чиқарилган.
Изоҳ (0)