Ўзбекистоннинг қатор ҳудудларида ҳайдовчилик гувоҳномаларини олиб беришни ваъда қилган шахслар ушланди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Хусусан, Бош прокуратура ҳузуридаги департаментнинг Урганч тумани бўлими томонидан ИИБ ходимлари билан ҳамкорликда тезкор тадбир ўтказилган. Унда фуқаро С. I. 2 нафар фуқаронинг ишончига кириб, уларни танишлари орқали ҳайдовчилик гувоҳномасини олиш учун бўлиб ўтадиган имтиҳондан ўтказиб қўйиш эвазига 700 доллар ва 1,1 миллион сўмни олган вақтида ашёвий далиллар билан ушланган.
Департамент ҳамда ДХХнинг Сирдарё вилояти бошқармалари томонидан ИИБ ходимлари билан ҳамкорликда ўтказилган тезкор тадбирда «Ватанпарвар» ташкилоти тасарруфидаги Гулистон шаҳри ўқув спорт техника клуби ўқитувчиси Т.К. фуқаролар I.Б. ва Қ.У.га танишлари ёрдамида ҳайдовчилик гувоҳномаси олиб бериш эвазига 600 долларни олган вақтида ашёвий далиллар билан ушланган.
Бухоро вилояти бошқармаси томонидан ўтказилган тезкор тадбирда эса фуқаро У.Т. бошқа бир фуқаро Ш.га танишлари ёрдамида ҳайдовчилик гувоҳномаси олиб беришни ваъда қилиб, эвазига 6 миллион сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)