Тошкент вилоятида бир гуруҳ шахслар 4,5 гектар ерни 240 минг долларга сотмоқчи бўлгани аниқланди
Тошкент вилоятида ноқонуний ер сотиш ҳолати аниқланди, деб хабар бермоқда ИИВ ЖҚББ Коррупция ва иқтисодий жиноятларга қарши курашиш бошқармаси.
Маълум қилинишича, 29 август куни ИИВга аёл фуқаро ариза билан мурожаат қилиб, икки нафар шахсларга нисбатан қонуний чора кўришни сўраган. Аризада айтилишича, аёл ер олиш мақсадида «OLX.uz» сайти орқали нотаниш маклер билан танишиб қолган. Сўнг ушбу маклер Сирдарё вилояти, Сирдарё туманидаги «Бек гравй» МЧЖ раҳбарининг ўғли билан таништирган.
У жамиятга ажратилган 4,5 гектар бўш ер майдонини 240 минг долларга сотишини ва кадастрда ишловчи таниши орқали ер майдонига ҳеч қандай қурилма қурмасдан кадастр ҳужжатларини расмийлаштириб беришини айтган, Эвазига аёлдан 1 000 доллар ва ер майдони учун бўнак сифатида 12 минг доллар талаб қилган.
Мазкур аризага асосан шу куни ИИВ ЖҚБ К ва ИЖҚКБ, Ер ресурсларини талон-тарож қилинишига қарши курашиш бўлими, Бош прокуратура ҳамда Иқтисодий жиноятларга қарши курашиш Департаментининг Зангиота туман бўлими ходимлари билан ҳамкорлигида тезкор тадбир ўтказилган.
Ўтказилган тезкор тадбир давомида Тошкент вилояти, Зангиота тумани, «MAN» автосалони автотураргоҳида гумонланувчи маклер ариза муаллифидан талаб қилган пуллардан 13 минг долларни аванс сифатида олган вақтида ашёвий далиллар билан ушланган.
Ҳолат юзасидан 30 август куни ИЖҚК департаментининг Зангиота тумани бўлими томонидан гумонланувчи ва бошқаларга нисбатан Жиноят кодексининг тегишли моддалари билан жиноят иши қўзғатилиб, фуқаролар ушланган.
Олиб борилган терговолди текширув ишлари давомида гумонланувчи кадастр ҳужжатларини ким орқали расмийлаштириб бермоқчи бўлгани аниқланиб, ҳозирда ушбу шахснинг жиноятга алоқадорлиги текширилмоқда.
