Ижтимоий тармоқларда «қўл ҳаракати билан даволовчи табиб» видеоси тарқалмоқда. Изоҳларда бу табиб Ўзбекистон Табобат академиясида расмий рўйхатдан ўтгани айтилмоқда. Мазкур видеоларда табиб деб аталаётган эркак беморларнинг танаси атрофида турли қўл ҳаракатларини бажараётгани акс этган. Шундан сўнг табиб бемордан «Яхши бўлдингизми?» деб сўраб, беморлардан тасдиқлатиб олмоқда ва ушбу видеоларни ўзининг ижтимоий тармоқлардаги саҳифаларига жойламоқда.
«Дарё» мазкур табиб бўйича изоҳ олиш учун Халқ табобати ассоциацияси билан боғланди. Ташкилот раиси Рўзимуҳаммад Хонназаров бу бўйича қуйидаги фикрларни билдириб ўтди.
«Мазкур видеодаги шахс қўқонлик Иқбол Солиев. Бу инсонни мен яхши танийман. Бир неча бор суҳбатлашганман. Чунки биз бугун табиблар ва табибликка даъвогарлар ҳақида маълум бир даражада маълумотларга эгамиз. Интернетда тарқалаётган хабарларда у Ўзбекистон Табобат академиясида расмий рўйхатдан ўтганлиги таъкидланган. Ҳозирги пайтда қайси табибни учрацангиз, ‘фалон академиянинг аъзоси’ ёки ‘академиги’ бўлиб чиқади. Албатта бу алоҳида бир мавзу бўлиб, ҳали бунга алоҳида тўхталиб ўтамиз.
Аввало шуни таъкидлаб ўтиш керакки, халқ табобати табиий гиёҳлар, ҳайвон маҳсулотлари, маъданлар ёрдамида турли касалликларни даволашдан иборат амалий фаолиятдир.
Шу билан бирга, халқимиз орасида азалдан силовчилар, кинначилар, дуохонлар мавжуд бўлиб, улар қўл бериш йўли билан ўз иқтидорларини халқ хизматига йўналтиради. Бу инсонлар ўзларини ‘ғайриоддий’ инсон эканликларини бот-бот таъкидлаб, ўзларини ижтимоий тармоқлар орқали машҳур қилишга ҳаракат қилади. Аниқроқ қилиб айтадиган бўлсак, мижоз қидиради.
Видеодаги табиб эса оддий қўл ҳаракатлари ёрдамида бир лаҳзада инсонларга шифо улашаётгани айтилмоқда. Мен бу инсоннинг ҳаракатларини тасдиқлаш ёки инкор қилиш фикридан йироқман. Чунки инсонларда учраб турадиган ‘ғайриоддийлик’ ҳақида ҳазрат Ибн Синодан сўрашганда у зот ‘Ушбуни рад этишга шошилманғ деган эканлар.
Табобатда биоэнергия билан даволаш амалиёти мавжуд. Буни инкор этмайман. Бунда инсондаги 5 та омил — ҳарорат (36,6 С), биоқувват, магнит майдони, инфрақизилнур, энергия ахбороти орқали бемор кишига таъсир ўтказилади. Бунинг учун муайян вақт талаб қилинади.
Аммо видеодаги ҳолат рост бўлса, агар бу табиб қўл ҳаракатлари билан оғир бемоларни шундай осонлик билан бир лаҳзада даволаётган бўлса, атрофда касал одам қолмас эди. Касалхоналаримизда шифо истаб ётган кўплаб оғир беморлар, ногиронлар, хасталар бор. Унда нега уларни оёққа турғизиб юбормаяпти?
Бундай ҳолатларнинг юзага келишига сабаб, авваламбор, одамларнинг тиббий билим ва маданияти етарли даражада эмаслиги ҳисобланади. Шунингдек, кўрсатилаётган тиббий хизматлардан шифо топмаётган беморлар мўъжиза истаб тўғри шу каби шахсларнинг тузоғига боради. Одамларимиз содда, самимий деймиз. Бу соддаликдан ҳам кўра кўпроқ тиббий маданият, бирламчи тиббий билимнинг йўқлигидан дарак беради.
Масалан, Германияда ҳеч қачон тўсатдан бундай табиблар пайдо бўлгани ҳақида эшитмайсиз. Чунки у ердаги оддий аҳолининг тиббий билими биздаги баъзи сохта табиблар ва шифокорларникидан яхшироқ деб ўйлайман. Шу сабабли кимдир қўл билан даволайман, деб даъво қилиб чиқадиган бўлса, унга савол беришни билишади.
Бизда ҳам аҳолининг тиббий маданияти ва кўрсатилаётган тиббий хизматлар сифати ошса, айрим қўштирноқ ичидаги табибларга бўлган оммавий қизиқишлар ўз-ўзидан барҳам топади», — деди Халқ табобати ассоциацияси раиси Рўзимуҳаммад Хонназаров.
Изоҳ (0)