Ўзбекистонлик стартапчилар Марк Цукерберг компаниясидан грант ютиб олди. Инвестициялар ҳажми 3 миллион доллар

Қорақалпоғистонлик Бекназар Абдикамолов ва Азиз Муртазоев сингапурлик ҳамкори Жастин Ким билан биргаликда «Ами» руҳий саломатлик бўйича стартап ишга тушириш учун Мета (Facebook) грантини қўлга киритдилар. Инвестициялар ҳажми 3 миллион долларни ташкил этди. Бу ҳақда IT Park хабар берди.

Лойиҳа руҳий саломатлик хизматини янада қулайроқ қилиш учун онлайн маслаҳат сеансларини ўз ичига олади. Бу Осиё мамлакатларидаги бизнес эгаларига ўз ходимларининг руҳий саломатлигини яхшилаш имконини беради.

Стартап асосчиларининг таъкидлашича, бундай платформани яратиш ғояси пандемиядан кейин пайдо бўлган, негаки Жаҳон соғлиқни сақлаш ташкилотининг 2022 йил март ойидаги ҳисоботига кўра, пандемиядан сўнг бутун дунё бўйлаб депрессия, тушкунлик даражаси 25 фоизга ошган.

Биз «Ами» жамоасининг иштиёқи ва истеъдодидан ҳайратдамиз. Уларнинг Осиё аҳолисига руҳий саломатликларини сақлаш йўлида яна бир усул тақдим этиш саъй-ҳаракатларини қўллаб-қувватламоқчимиз, — деди Сунита Парасураман, Мета компаниясининг инвестициялар бўлими раҳбари.

Осиёнинг улкан стартап марказлари Сингапур ва Жакартадан ташқари, «Ами» стартапини бутун Осиё бўйлаб кенгайтириш, бу орқали компанияларга руҳий саломатлик платформаси ёрдамида юқори малакали мутахассисларни жалб қилиш имкониятини яратиш режалаштирилмоқда.

Лойиҳа асосчилари, жамиятда руҳий саломатлик аҳамияти ҳақидаги билимларни оширишни ўзлари учун олий мақсад деб билишади.

Молиялаштириш босқичида Метаъга инвесторлардан Goodwater Capital, Strong Ventures, January Capital ва Collaborative Fund келиб қўшилди.

Аввалроқ ўзбекистонлик йигит АҚШда ўзиюрар машиналар соҳасида стартап асосчиларидан бири бўлгани ҳақида хабар берилган эди.